(Isinusulong sa Kamara) PAUTANG SA FARMERS PADALIIN

ITINUTULAK ni House Committee on Ways and Means chairman at Albay Rep. Joey Salceda na gawing madali, accessible at mas mababa ang interes ng pautang para sa mga magsasaka.

Sa panukalang ‘Rural Agricultural and Fishe­ries Financing Enhancement System Act’, bukod sa gagawing accessible ang banking services sa mga magsasaka, itinutulak din ni Salceda ang ilang reporma sa mga bangko para suportahan at palawakin ang mga kailangang financial inclusion project sa mga probinsiya.

Inaamyendahan ng panukala ang Agri-Agra Reform Act of 2009 o ang Republic Act No. 10000 na layong magpasa ng mga reform bill para makamit ng bansa ang credit ‘A’ rating alinsunod na rin sa hiling ng Bangko Sentral ng Pilipinas (BSP).

Ayon kay Salceda, naging problema sa kasalukuyang batas ang kawalan ng mekanismo para matulungan ang produksiyon ng mga magsasaka, mababang kita, at pagiging high risk-credit ng mga ito.

Sa ilalim ng panukala, inoobliga ang mga bangko na magtakda ng credit level para sa mga magsasaka at ma­ngingisda, gayundin ang pagpapadali para sa pagpapautang at mas mababang interest ng loans.

Layon ng pag-am­yenda na walang maging gastos ang mga magsasaka kung sila ay mangu­ngutang.

Hindi, aniya, naging epektibo ang Agri-Agra Reform Act dahil wala namang mga bangko ang karamihan sa mga magsasaka at high-risk din ang mga ito pagdating sa pagpapautang ng mga conventional bank dahil sa dami ng kailangang requirements. CONDE BATAC