(Isinusulong sa Senado) SATELITE TECHNOLOGY

IGINIIT ni Senador Win Gatchalian ang pangangailangan ng paggamit ng satellite technology bilang alternatibong solusyon sa pagkakaroon ng mas maasahang internet connection lalo na sa mga malalayong lugar sa bansa na walang imprastraktura ng telecommunications companies.

Sa Senate Bill No. 2250 o ang panukalang “Satellite-Based Technologies for Internet Connectivity Act of 2021,” ipinaliwanag ni Gatchalian na maaaring magamit ang satellite upang makakuha ng internet signal mula sa Internet Service Provider (ISP) na magkokonekta sa mga gumagamit ng internet. Sa kanyang paglalarawan, ang ISP ang magpapadala ng fiber internet signal sa satellite na nasa kalawakan. Gamit ang satellite dish, ito ang pagkukunan ng signal ng modem upang magkaroon ng koneksiyon sa internet.

Ayon kay Gatchalian, marami pa rin ang hindi gumagamit ng digital technology sa bansa sa kabila ng pagkakaroon ng iba’t ibang virtual platforms na naging paraan para mabawasan ang pisikal na interaksiyon magmula nang magkaroon ng pandemya dulot ng COVID-19. Nasa 45% ng mga Filipino at 74% ng pampublikong paaralan sa buong bansa ang walang internet connectivity. Mas malala ang sitwasyon sa Visayas at Mindanao dahil wala pa sa 40% ang naitalang gumagamit sa kanila ng internet.

“Ang problema natin, bukod sa kulang sa imprastraktura, limitado pa rin ang bilang ng mga nagbibigay serbisyo pagdating sa internet connection. Kaya kahit na sabihin pang bumibilis na ang internet sa ilang mga siyudad, hindi pa rin ramdam lalo na sa mga liblib na probinsya na walang cell sites o towers,” ani Gatchalian.

Hindi na, aniya, bagonang satellite-based internet dahil ginagamit na ito ng mga maraming bansa upang makapagbigay ng internet service, lalo na sa mga lugar kung saan malaki ang hamon ng paglalagay ng wired o mobile networks.

Sa pamamagitan ng nasabing panukala, masisiguro ang mas maayos na internet access dulot ng pagkakaroon ng mga bagong satellite technology at maaabot pa ang mga lugar na kulang o walang nagagamit na koneksiyon sa internet, sabi ng senador. VICKY CERVALES

Related posts:

(Magpapalakas sa exports, investments) RENEWAL NG PH SA EU GSP+ (Sa paulit-ulit na pagbaha) DPWH, MMDA GIGISAHIN SA SENADO TAXPAYERS’ BILL OF RIGHTS LUSOT NA SA SENADO Bong Go lauds continued operation of Malasakit Centers amid country’s rising health concerns as more than half a million benefit in Davao Region (Sa nakabimbing ODA-financed projects) DAGDAG-GASTOS NG GOBYERNO BUBUSISIIN P5.768-T 2024 PROPOSED NATIONAL BUDGET ISINUMITE SA KAMARA (Itinutulak sa Senado) 20% DISCOUNT SA TRAVEL TAX NG SENIORS (Isusulong sa Senado) VOUCHER SYSTEM PALAWAKIN SA K-6