LAGUNA – TIMBOG sa ikinasang buy bust operation ng mga elemento ng San Pablo City-PNP ang 42-anyos na babaeng brgy. kagawad at kasamahan nito sa Brgy. Sta. Maria, Magdalena, Lungsod ng San Pablo kamakalawa ng hapon.
Base sa ulat ni PLt. Col. Eliseo Bernales, hepe ng pulisya, nakilala ang naarestong suspek na si Presca Bichayda Perez, dalaga, kagawad ng Brgy. I-B at kasamahan nitong si Gilbert Bartolome Abad alyas “Bakla”, 30, binata, napapabilang sa drugs watchlist, ng Brgy. Del Remedio, lungsod na ito.
Dakong alas-4:10 ng hapon nang magkasa ng buy bust operation ang mga tauhan ni Bernales at PDEA Laguna sa lugar kung saan target umano ng mga ito si alyas Bakla habang ang isa sa mga ito ang nagpanggap na buyer gamit ang halagang P500.
Makaraan ang isinagawang operasyon, hindi inaasahang napabilang sa naaresto ang brgy. kagawad na si Perez kung saan siya ang nagmamaneho ng sinasakyan nilang kotseng Toyota RAV4 na may plakang ZDD-640.
Nakumpiska sa kanilang pag-iingat ang 5 small heatsealed transparent plastic sachet ng shabu at 2 cellphone kung saan kapwa nakapiit ang mga ito sa San Pablo City-PNP Lock Up Cell at nahaharap sa paglabag sa kasong Section 5,11, and 26 of RA-9165. DICK GARAY
Comments are closed.