LOLO NIRAYUMA SA PAGTAKAS SA PULIS

ARESTADO ang dalawang sugarol kabilang ang isang lolo na inatake ng rayuma nang makipaghabulan makaraang salakayin ng mga pulis ang ilegal na mga nagsusugal sa Malabon City, ka­makalawa ng gabi.

Kinilala ni Malabon police chief Col. Angela Rejano ang naarestong mga suspek na si Amable Salvador, 65-anyos ng 466 M. Blass St. at Rodel Flaviano, 49-anyos ng Sulucan St. kap­wa ng Brgy. Hulong Duhat.

Sa report nina PSSg Diego Ngippol at PCpl Michael Oben kay Col. Rejano, nakatanggap ng ulat ang mga pulis mula sa isang concerned citizen hinggil sa ilegal na pagsusugal ng “Tong its” sa Sulucan St. Brgy. Hulong Duhat.

Kaagad bumuo ng team ang mga tauhan ng Station Intelligence Unit sa pangunguna ni P/Capt. John David Chua, kasama ang Sub-Station 7 sa pangunguna ni PLT Edgardo Magnaye bago sinalakay ang naturang lugar dakong alas-9:05 ng gabi.

Pagdating sa lugar, nakita ng mga pulis ang mga nagsusugal subalit nang mapansin ang kanilang presensya ay mabilis na nagpulasan ang mga suspek sa magkahiwalay na direksyon.

Hinabol sila ng mga pulis hanggang sa maaresto si Salvador at Flaviano kung saan narekober sa kanila ang isang set ng baraha at P580 bet money. VICK TANES