ISABELA – PATAY ang dalawang magkapatid makaraang nalunod sa malalim na sapa sa bahagi ng Barangay Fugu, Ilagan City ng lalawigang ito kahapon ng umaga.
Naisugod pa sa ospital subalit idineklarang patay ang magkapatid na sina Ryan Tagao, 5-anyos at si Leo Tagao, 4-anyos, kapwa residente ng nasabing barangay.
Sa imbestigasyon ng Ilagan police, nagkayayaan ang mag-utol kasama ang kanilang nakatatandang kapatid na lalaki at kaibigan na maligo sa sapa bandang alas-8 ng umaga.
Nabatid na napagawi ang dalawang biktima sa malalim na bahagi ng sapa kaya humingi ng saklolo sa dalawang kasama na kaagad naman kumuha ng sanga ng punungkahoy para masagip.
Nabigong sagipin ang mga biktima kaya humingi ng tulong sa mga residente ang dalawang kasama subalit huli na ang lahat. IRENE GONZALES
Comments are closed.