MGA NOMINADO SA GAWAD URIAN INANUNSIYO NA

INANUNSIYO na ang mga  nominado sa ika-41 edisyon ng Gawad Urian awards ng Manunuri ng Pelikulang Pilipino.

Nangunguna ang “Res­peto” na nakakuha ng 11 nominasyon. Sinundan ito ng “Tu Pug Imatuy” at “Balangiga: Howling Wilderness” na parehong me­rong may 9 na nominasyon.

Pito naman ang nominasyon ng “The Chanters” at “Ang Larawan” samantalang tig-anim ang nakuhang nominasyon ng “Birdshot”, “Bhoy Intsik” at “Changing Partners”.

Lima naman ang nakuhang nominasyon ng “Smaller and Smaller Circles” sa acting at technical categories.

Magiging pukpukan ang laban sa Best Actress race nina Alessandra de Rossi ng “Kita Kita”, Bela Padilla ng “100 Tula Para kay Stella”, Angeli Bayani ng “Bagahe”,  Joanna Ampil ng “Ang Larawan”, Gloria Diaz ng “Si Chedeng at Si Apple”, Dexter Doria ng “Paki”, Jally Nae Gilbaliga ng “The Chanters”, Agot Isidro ng “Changing Partners”, Elizabeth Oropesa ng “Si Chedeng at si Apple”, Angellie Nicholle Sanoy ng “Bomba,” at Malona Salutan ng “Tu Pug Imatuy”.

Sa Best Actor category naman ay nominado sina Empoy Marquez ng “Kita Kita”, Abra ng “Respeto”, Nonie Buencamino ng “Smaller and Smaller Circles”, Timothy Castillo ng “Neomanila”, Noel Comia Jr. ng “Kiko Boksingero”, Allen Dizon ng “Bomba”, RS Francisco ng “Bhoy Intsik”, Jojit Lorenzo ng “Changing Partners” , Sandino Martin ng “Changing Partners” at Justine Samson ng “Balangiga:Howling Wilderness.

Sa Best Supporting actress naman ay magpapaligsahan sina Yayo Aguila ng “Kiko Boksingero”, Angeli Bayani ng “Maestra”, Shamaine Buencamino ng “Paki”, Jasmine Curtis-Smith ng “Siargao”, Chai Fonacier ng “Respeto”, Nathalie Hart ng “Historiographika Errata”, Odette Khan ng “Bar Boys”, Menchu Launchengco-Yulo ng “Ang Larawan”, at Gloria Sevilla ng “Maestra”.

Kapansin-pansin na dalawa ang nominasyon ni Angeli Bayani na parehong nominado sa Best Actress at Best Supporting Actress category.

Best Supporting Actor contenders naman sina John Arcilla ng “Birdshot”, Robert Arevalo ng “Ang Larawan”, Romulo Caballero ng “The Chanters”, Dido de la Paz ng “Respeto”, Pio del Rio ng “Balangiga: Howling Wilderness”, Nor Domingo ng “Respeto”, Ronwaldo Martin ng “Bhoy Intsik”, Jess Mendoza ng “Sa Gabing Nanahimik ang mga Kuliglig” at Arnold Reyes ng “Birdshot”.

Sa kategoryang best film, pasok sa mga nominado ang “Balangiga: Howling Wilderness” ni Khavn de la Cruz, “Bhoy Intsik” ni Joel Lamangan, “Birdshot” ni Mikhail Red, “Respeto” ni Treb Monteras,at  “The Chanters” ni Arnel Barbarona.

Sa Best Director derby, magsasabong sina Arnel Barbarona ng “Tu Pug Imatuy”, Sigrid Andrea P. Bernardo ng “Kita Kita”, Khavn De La Cruz ng Balangiga: “Howling Wilderness”, Joel Lama­ngan ng “Bhoy Intsik”, James Robin M. Mayo ng “The Chanters”, Treb Monteras II ng “Respeto,” at Mikhail Red ng “Birdshot.”

Ang 41st Gawad Urian awards ay gaganapin sa Hunyo 14.