DUMATING na si James Harden, isa sa All-Star guards ng Houston Rockets, sa Disney World complex sa Orlando, Florida noong Martes ng gabi.
Nag-post ang koponan sa Twitter ng video ni Harden nang dumating ito sa campus. Si Harden, ang 2018 NBA Most Valuable Player, ay hindi kasama ng koponan nang lumipad ang Rockets sa Orlando noong nakaraang linggo.
Hindi pa rin makakasama ng koponan ang isa pang All-Star guard ng Houston na si Russell Westbrook makaraang magpositibo ito sa coronavirus disease. Kailangang niyang magnegatibo sa tests ng dalawang beses bago siya payagang samahan ang Rockets sa Disney World.
Samantala, kailangan munang sumunod si Harden sa quarantine protocol ng NBA bago ito makasama sa ensayo ng Rockets.
Ang eight-time All-Star ay may average na 34.4 points, 7.4 assists, at 6.4 rebounds para sa Houston, na nasa ika-6 na puwesto sa Western Conference na may 40-24 win-loss record.
Ang NBA season ay magpapatuloy sa Hulyo 30 na may 22-team format makaraang suspendihin ang liga noong nakaraang Marso dahil sa pandemya.
Comments are closed.