P10 FARE SA JEEP MAAANTALA

POSIBLENG maantala ang implementasyon ng sampung pisong mini¬mum na pamasahe sa jeep.

Ito ang pahayag ni  Land Transportation Franchsing Regulatory Board  (LTFRB)  Chairman Martin Delgra III makaraang maghain ng motion for reconsideration ang ilang commuters group.

Ang nabanggit na dagdag singil sa mga pampasaherong jeep ay nakatakda sanang ipatupad sa Nobyembre 3.

Sa press briefing sa Malakanyang, sinabi ni Delgra na natanggap na nila kahapon ang pagtutol sa dagdag singil sa pasahe ng isang oppositor at commuters group na  United Filipino Consumers and Commuters.

Sinabi ni Delgra na nakatakdang talakayin ng board ngayong araw ang mosyon at pipiliting madesisyunan sa loob ng 15 araw para maihabol ang dagdag pasahe na ipatutupad sa Nobyembre 3.

Noong Oktubre 15 ay naisagawa ang publication ng dagdag sa pasahe  at labing limang araw pagkatapos ng pagkakalat­hala ay saka magiging epektibo  ito.

Samantala, inanunsiyo ni Delgra na ang ipamamahaging fare matrix sa mga jeepney operator para sa bagong singil  sa pasahe ay babayaran ng P50.00  bukod pa sa one time fee kada prangkisa  na nagkakahalaga naman ng P250.      EVELYN QUIROZ