P15K CASH GRANT SA VENDORS ISINUSULONG NG DSWD

ITINUTULAK ng Department of Social Welfare and Development (DSWD) ang pagpapatupad ng liveli-hood program para sa mga vendor at maliliit na tindahan na naapektuhan ang kita dahil sa COVID-19 pandemic.

Ang plano ay inihayag ng DSWD sa Senate hearing sa budget ng ahensiya bilang tugon sa agam-agam ng ilang senador sa P10 bilyong pondo na hindi nagamit para sa social amelioration program (SAP) para sa mga mahihirap na pamilyang tinamaan ng pan-demya.

Ayon kay DSWD Undersecretary Restituto Macuto, hinihintay na lang nila na aprubahan ng Office of the President ang paglaan ng pondo sa programa.

“Ang atin pong tinatarget dito [ang] informal sector. ‘Yung mga kababayan nating nagtitinda sa mga palengke, ‘yun pong mga nagtitinda ng gulay-gulay, mga sari-sari store. We have already oriented our local government units for this particular program. So, they are ready now, hintay lang po kami ng pondo para po makapag-start na kami immediately,” pahayag ni Macuto sa pagdinig.

Sa ilalim ng programa ay pagkakalooban  ng P15,000 cash aid ang maliliit na negosyong hinambalos ng pandemya para matulungan silang makabangon.