PAGTUTULUNGAN PARA SA MGA PINOY OVERSEAS HINILING

HINILING  ni Senador Christopher Bong Go sa Legislative at Executive branch na magtulungan para sa mas mabilis na pagtugon sa  mga pa­ngangailangan ng mga Pinoy sa ibang bansa  na kumakatawan sa 10% ng kabuuang populasyon.

Ang apela ay ginawa ni Go sa mga kapwa senador sa isinagawang pagdinig sa mga panukala na may kaugnayan sa overseas Filipino workers.

Sa pagdinig ng Senate Committee on Labor, Employment and Human Resources Development, kinilala ni Go ang mala­king  contribution ng  mga OFW  sa ekonomiya ng bansa.

Binigyang-diin nito na matagal nang itinutu­ring na mga bagong bayani  ang mga OFW kaya naman panahon na ring ibalik sa mga ito ang mas mabuting serbisyo.

Giit ni Go, lalo na ngayong panahon ng COVID-19 pandemic, dapat din tutukan ang kapakanan ng mga ito  kung saan marami ang nawalan ng trabaho at ngayon ay nahihirapan na maibigay ang pangangailangan ng kanilang pamilya.

Inihayag pa ni Go na maraming OFW ang stranded  at hindi makauwi sa bansa dahil sa paghihigpit sa biyahe  sa buong mundo na nakakadagdag sa psychological stress ng mga ito.

Dagdag pa ng senador,  batid naman ng marami kung gaano kalapit kay Pangulong Rodrigo Duterte  ang mga OFW kaya naman hindi nito papayagang mapabayaan ang mga ito. VICKY CERVALES