HINIMOK ng mga Obispo ng bansa ang publiko na makiisa sa ikaapat na taon ng Walk For Life ngayong 2020.
Umaasa si Catholic Bishops’ Conference of the Philippines (CBCP) President, Davao Archbishop Romulo Valles na sa pamamagitan ng pagkilos na ito ay aktibong maipakikita ng mananampalataya ang adbokasiya, pagmamahal at respeto ng bawat tao sa buhay.
“We hope and pray that many of us will be there to show our interest, our commitment, our heart for advocacy in love and respect for life,” ani Valles
Sa panig naman ni CBCP Vice President at Kalookan Bishop Pablo Virgilio David, sinabi nito na ang bawat yugto ng buhay mula sa sinapupunan ay dapat na igalang at pangalagaan.
Aniya, maging ang buhay ng mga dukha at mga pinapatay dahil sa giyera kontra ilegal na droga ay mahalaga, kaya naman kinakailangan ang pakikiisa ng lahat para sa mga napagkakaitan ng dangal at buhay.
“Napakahalaga po na makisama tayo dito sa adhikain na ito kung tayo talaga ay naniniwala na kailangang ipagtanggol ang buhay, to walk for life in all its stages. Ang buhay ng mga sanggol, ang buhay ng mga dukha, ang buhay ng mga napapatay sa giyera sa droga at marami pang ibang mga tao na napagkakaitan ng dangal at buhay. Kailangan po ang ating pakikiisa kaya sana po wag nyong kalilimutan sumali po tayo dito sa ating ikaapat na taon ng Walk for Life,” ani David.
Binigyang-diin naman ni dating CBCP president at Lingayen, Dagupan Archbishop Socrates Villegas ang kahalagahan at kabanalan ng buhay ng tao dahil ito ay nagmula sa Panginoon.
Ayon kay Villegas, mahalaga ang taunang pakikiisa ng mamamayan, maging ang mga nasa lalawigan upang ipakita ang matibay na paninindigan ng mga Filipino para sa pangangalaga sa buhay.
“Ang buhay ay banal, ang buhay ay handog ng Diyos at tayong lahat ay katiwala ng buhay na ito… tayo pong lahat ay tumayo manindigan magdasal ipagtanggol ang buhay na kaloob ng Diyos,” pahayag ni Villegas sa church-run Radyo Veritas.
Ang Walk For Life 2020 ay gaganapin sa Pebrero 15, alas-4:00 ng madaling araw sa Quezon Memorial Circle.
Pangungunahan ito ng Sangguniang Layko ng Pilipinas, kasama ang iba’t-ibang mga diyosesis sa bansa na magsasagawa din ng simultaneous Walk for Life.
Kabilang dito ang Archdiocese of Lingayen Dagupan, Archdiocese of Cagayan De Oro, Archdiocese of Palo, Diocese of Tarlac, at Archdiocese of Cebu. ANA ROSARIO HERNANDEZ
Related posts:
TULONG HINILING NG OBISPO PARA SA MGA BIKTIMA NG LINDOL
COVID-19 SA PIITAN (Ikinabahala ng mga Obispo)
OBISPO UMAPELANG MAGTULUNGAN PARA MAPALAKAS ANG KARAPATAN NG PH SA MGA ISLA
OBISPO UMAPELA NG MAS MARAMING KAPASIDAD SA SIMBAHAN
(Panawagan ng Obispo sa publiko) MAGDASAL UPANG MAIADYA SA BAGYONG ROLLY
(Iminungkahi ng Obispo ngayong pandemya) KUMPISAL GAWING VIRTUAL
(Publiko hinikayat ng Obispo) POLITICAL DYNASTY HUWAG SUPORTAHAN
MGA KANDIDATO, HINIMOK NG OBISPO NA IWASANG MAGPAKALAT NG FAKE NEWS PARA MANALO SA ELEKSIYON
Comments are closed.