NAVOTAS CITY – PATAY ang isang batang babae matapos aksidenteng masagasaan ng isang sports utility vehicle (SUV) sa lungsod na ito kamakalawa ng gabi.
Kinilala ang biktima na si Elijah Tiffany Salvador, 1, ng 18A Leongson St, Brgy. San Rogue, ng lungsod habang pinaghahanap pa ng mga pulis ang driver ng nasangkot na sasakyan na si Meldy Santos, nakatira din sa nasabing lugar.
Batay sa natanggap na ulat ni Navotas Police Chief P/Col. Rolando Balasabas, alas-6:30 Sabado ng gabi nang maganap ang insidente sa Leongson St., corner Pat De Asis St., Brgy. San Roque, ng lungsod.
Ayon sa saksing si Rachelle Anne Solomon, 26, ng nasabi ring lugar, naglalakad ang biktima nang madulas sa gutter at nahulog sa kalsada kaya’t aksidente itong nabundol ng pulang Mitsubishi Montero na minamaneho ni Santos.
Tumakas si Santos matapos ang insidente habang itinakbo ng kanyang kaanak na si Andrew Mendoza y Madrid ang biktima sa Navotas City Hospital gamit ang sasakyang nakasagasa rito ngunit idineklarang dead-on-arrival sa nasabing pagamutan.
Ayon kay Col. Balasabas, kasong reckless imprudence resulting in homicide ang isinampa kontra kay Santos sa Navotas City Prosecutor’s Office. EVELYN GARCIA
Comments are closed.