PBA 3×3 LEG CROWN NABAWI NG TRIPLE GIGA

WALANG sinayang na oras ang TNT para mabawi ang nawalang glorya noong nakaraang linggo.

Naghari ang Triple Giga sa Leg 5 ng PBA 3×3 Second Conference nitong Martes makaraang maiposte ang 21-13 panalo laban sa Pioneer Elastoseal sa Ayala Mall Fairview Terraces.

Kinailangan ni Almond Vosotros and Co. ng wala pang 10 minuto upang tapusin ang Katibays at ang championship match sa pagsubi ng P100,000 prize money.

Bumanat ang TNT ng 9-3 run upang itarak ang 14-7 kalamangan at hindi na lumingon pa.

Isinalpak ni Vosotros ang deuce sa 1:43 mark upang kunin ang ika-4 na titulo ng TNT sa limang legs ng conference.

Tumapos sina Chester Saldua, Samboy De Leon, at Vosotros na may tig-6 points, habang nagdagdag si Ping Exciminiano ng tatlo sa isang balanced-scoring para sa Triple Giga ni coach Mau Belen.

Nauna rito ay nakaganti ang TNT sa had Leg 4 ruler MCFASolver sa pagsibak sa guest team sa semifinals, 21-18.

Samantala, umabante ang Pioneer Elastoseal, na kinuha ang runner up purse na P50,000, sa finals sa likod ng 18-16 win laban sa NorthPort sa isang hindi inaasahang semifinals match up.

Sa huli ay nakopo ng MCFASolver ang third place makaraang gapiin ang NorthPort, 21-15.

Naibulsa ng Tech Centrale ang P30,000 premyo.

CLYDE MARIANO

Iskor:
Third place:
MCFASolver (21) – Ramirez 11, Vigil 6, Tumalip 4, Andrada 0.

Northport (15) – Capacio 8, Alabanza 4, Sobrevega 2, Zamora 1.

Finals:
TNT (21) – Vosotros 6, Saldua 6, De Leon 6, Exciminiano 3.

Pioneer Elastoseal (13) – Baltazar 4, Morido 4, Villamor 3, Mocon 2.