PBA 3X3: PIONEER, MERALCO SA Q’FINALS

ILANG koponan ang hindi nakatikim ng talo sa pagsisimula ng Leg 2 ng PBA 3×3 second conference nitong Sabado sa Araneta Coliseum.

Winalis ng Pioneer Pro Tibay ang lahat ng kanilang apat na preliminary games sa Pool A makaraang pataubin ang Sista Super Sealers (19-14), Master Sardines Fishing Champs (21-15), San Miguel Beermen (21-17), at Leg 1 champion TNT Tropang Giga (21-13).

Sa nangunguna at walang dungis na 4-0 kartada sa Pool A, ang Pioneer ay nakausad sa quarterfinals, kasama ang TNT, na nasa ikalawang puwesto na may 2-1. Ang San Miguel, Sista, at Master Sardines ay nasa ikatlo, ikaapat, at ika-limang puwesto, ayon sa pagkakasunod-sunod.

Sa Pool B ay pasok na rin ang Meralco Bolts sa knockout stage na may 2-0 marka makaraang magwagi laban sa Terrafirma 3×3 (18-10) at Platinum Karaoke (21-16).

Nasa ikalawang puwesto ang Platinum na may 1-1 marka, kasunod ang Purefoods TJ Titans at Terrafirma 3×3.

Nakasiguro na rin ang Limitless Appmasters ng puwesto sa knockout stage kasunod ng 2-0 record matapos na gapiin ang Barangay Ginebra San Miguel (21-17) at Cavitex Braves (21-15).

Magpapatuloy ang preliminary round ngayong Linggo na susundan ng playoff round.  CLYDE MARIANO