(Pinamamadali sa pamahalaan) VACCINATION PASS SA OFWS

INIHIRIT ni Senadora Imee Marcos sa pamahalaan na huwag nang patagalin pa ang pagbibigay ng mga vaccination pass sa overseas Filipino workers (OFWs) na nangangailangan nito para makapagtrabaho sa ibang bansa.

Ayon kay Marcos, kaya nang simulan ng Department of Information and Communications Technology (DICT) ang pag-iisyu ng mga vaccination pass kung bibigyan ng prayoridad ang mga OFW, sa halip na hintayin pa ang mga local government unit na maayos ang mga backlog nito sa pagpapadala ng datos ukol sa pagbabakuna ng lahat ng kanilang mga nasasa-kupan.

“Ang mas madiskarteng target ang solusyon. Ang mga OFW na may kasalukuyang mga job contract, mga bumibiyaheng negosyante, at mga estudyanteng humahabol sa mga school terms nila abroad ang dapat na unahing bigyan ng passes,” sinabi ni Marcos.

Inihalimbawa ni Marcos ang Japanese government na mahusay na napangangasiwaan ang bulto o dami ng mga vaccina-tion data sa pamamagitan ng pag-iisyu ng passes sa mga may kagyat lang na pangangailangan at nag-apply sa public health centers na tumatagal lang ng 20 minuto.

“Nangako ang DICT sa Senate hearing noong isang taon pa na masisimulan ito ngayong Agosto. Naaalala ko dahil na-niwala ako,”  ani Marcos.

Habang hindi pa maayos ang isang ‘international system’ o pandaigdigang sistema sa beripikasyon ng vaccination passes, sinabi ni Marcos na kailangang maisaayos ng pamahalaan ang mga kasunduan sa ibang bansa na mayroong sariling listahan ng mga aprubadong bakuna, na mas istrikto pa sa inaprubahan ng World Health Organization (WHO).

“Hindi pa inaaprubahan ng mga bansang madalas na pinatutunguhan ng mga OFW, gaya ng Saudi Arabi at Japan, ang mga bakuna gaya ng sa Sinovac, na tinurok na sa milyon-milyong Pilipino,” sabi pa ni Marcos.

“Kahit ang pagsunod ng DICT sa patakaran ng WHO para sa hinihintay na VaxCertPH passes, na may mga QR code pa, ay hindi kasiguruhan na walang sagabal ang pagpasok ng mga OFW sa ibang bansa. Kailangang aregluhin pa ito ng magka-bilang gobyerno,” dagdag ni Marcos.

Nagbabala pa si Marcos na posibleng maulit sa ibang bansa ang problema ng mga OFW sa pagpasok sa Hong Kong kamakailan lang, kung hindi agad masimulan ng gobyerno ang pag-iisyu ng VaxCertPH passes.

Maiiwasan din, aniya, ang mga abala sa mga biyahero na pagsailalim sa mga mahahabang quarantine at madalas na PCR (polymerase chain reaction) test kung isasabay ng Department of Health na i-update at iayon mga quarantine protocols sa paglulunsad ng VaxCertPh passes, gaya ng ginagawa sa ibang bansa.

“Matapos ang paulit-ulit na mga lockdown, nakasusulyap na tayo ng pag-asang makabawi dahil sa mga vaccination passes. Kailangan natin ng layang gumalaw para madagdagan ang pagtangkilik sa mga negosyo at mabawasan ang kawalan ng trabaho,” pagbibigay-diin ng senadora. VICKY CERVALES

Related posts:

CHARTERED FLIGHT NG OFWs SA BEIRUT PUNO NA (Iginiit sa IATF) VACCINE PASSPORT SA OFWS (Apela sa pamahalaan) REPATRIATION SA STRANDED OFWS PAIGTINGIN (Travel ban aalisin na) 3K OFWS BALIK NA SA HONG KONG 323 STRANDED OFWs SA UAE NAKAUWI NA (Sa gitna ng bagong COVID-19 quarantine guidelines) 817K OFWs NAKAUWI NA 336 OFWS MULA KUWAIT  NAKAUWI NA 122 OFWS MULA EUROPE NAKAUWI NA