PSA EXECUTIVE OF THE YEAR SI MARCIAL

SA MATAGUMPAY na pamumuno sa restart ng 45th season ng PBA sa gitna ng pandemya, si Commissioner Willie Marcial ay gagawaran ng parangal sa San Miguel Corporation-Philippine Sportswriters Association (SMC-PSA) Awards Night sa Sabado.

Ang 10th commissioner ng Asia’s pioneering pro league ay pararangalan bilang Executive of the Year ng sportswriting fraternity ng bansa sa kauna-unahang virtual event nito sa March 27 sa TV5 Media Center.

Ang special honor ay isa sa 32 awards na ipagkakaloob sa event na itinataguyod ng San Miguel Corporation (SMC) at suportado ng Philippine Sports Commission (PSC) at Cignal TV.

Sina  Gretchen Ho at  Carlo Pamintuan ang magho-host sa programa na mapapanood sa March 28 sa One Sports+ mula alas-7 hanggang alas-8:30 ng gabi.

Hindi inalintana ni Marcial ang panganib at matapang na pinangunahan ang 500-plus strong PBA contingent sa Clark, Pampanga sa last quarter ng 2020, kung saan ipinagpatuloy ng liga ang Philippine Cup sa ilalim ng isang bubble format.

Ang Executive of the Year ang pinakabagong parangal na igagawad sa PBA chief, na kinilala rin ng PBA Press Corps at iba pang sports bodies at publications para sa kanyang pamumuno sa kritikal na sitwasyon sa gitna ng COVID-19 pandemic.

Matapos ang matagumpay na pagpapatuloy ng all-Filipino conference na napagwagian ng Barangay Ginebra, ang PBA ay naging modelo para sa lahat ng iba pang liga na nais ipagpatuloy ang kanilang mga laro sa pamamagitan ng kaparehong bubble setup.

Si Marcial ay naging ikalawang PBA commissioner na itinanghal na Executive of the Year ng pinaka-matandang media organization sa bansa na pinamumunuan ni Tito S. Talao, sports editor ng Manila Bulletin, matapos ni Chito Salud noong 2012.

Ang mga nauna nang tumanggap ng award ay sina William ‘Butch’ Ramirez, Ramon S. Ang, Manny V. Pangilinan, Wilfred Uytengsu, Hans Sy, Ricky Vargas, Dan Palami, Jude Echauz, at Philip Ella Juico.

Related posts:

PSA EXECUTIVE OF THE YEAR SI TOLENTINO