CAVITE- PATAY sa tama ng bala sa dibdib ang dating Physical Therapist ni dating Senador Manny Pacquiao nang matagpuan sa loob ng sinasakyang nitong Ford Raptor na inabandona sa gitna ng kalsada sa kahabaan ng Advincula Road, Brgy. Bucandala 4, Imus City nitong Sabado ng madaling araw.
Kinilala ng pulisya ang biktima na si alyas Rey, nasa hustong gulang, negosyante, residente ng Cavite City.
Sa ulat ng pulisya , dakong alas- 2:35 ng madaling araw nang makatanggap ng tawag sa ilang residente ang Police Community Precinct 7 hinggil sa umano’y may isang sasakyan na nakahambalang sa gitna ng kalsada ng nasabing lugar.
Sa pagisisiyasat ng pulisya, isang Ford Raptor Pick-Up na may Plate Number NGA 1035 ang inabutan sa lugar at nang siyasatin ang loob nito ay tumambad ang duguang biktima sa driver seat ng sasakyan at may tama ng bala sa dibdib nito.
Wala namang makapagsabi sa ilang residente kung may narinig silang putok o anumang kaguluhan sa nasabing lugar.
Sa kasalukuyan ay nagsasagawa ng ng follow up ang pulisya hinggil sa insidente. SID SAMANIEGO
