SORSOGON CITY-DEAD on the spot ang isang hard hitting radio commentator nang tambangan ng riding in tandem kamakalawa ng gabi sa nasabing lalawigan.
Patay sanhi ng tinamong apat na tama ng bala ang biktimang si Joebert Bercasio, tubong Rapu-Rapu, Albay, naninirahan sa Bacon District sa nasabing siyudad.
Sa inisyal na impormasyon, nangyari ang pagpatay isang oras pa lang ang nakakalipas nang i-post ng biktima sa kanyang Facebook account ang isang quarry operation sa bayan ng Bulan, sa naturang lalawigan.
Sinasabing si Bercasio ay isang hard-hitting commentator at dating announcer sa dzMS-AM bago lumipat sa Balangibog Internet TV kung saan ipinagpatuloy niya ang pagiging komentarista.
Nabatid na sakay ng kanyang motorsiklo ang biktima at tinatahak ang daan patungo sa Seabreeze Subd. nang isinagawa ang pananambang na kung saan dakong alas-9 ng gabi ay natagpuan itong nakabulagta ng mga nagrespondeng pulis.
Patuloy ang ginagawang imbestigasyon para matukoy ang mga salarin o posibleng mastermind sa paglikida sa media personality habang inaalam ang motibo kabilang na ang posibilidad na may kinalaman sa trabaho ang pananambang. VERLIN RUIZ
Comments are closed.