NILUWAGAN ng Philippine Basketball Association (PBA) ang requirements sa Filipino-foreigners na nais na maglaro sa liga.
Ayon kay PBA chairman Ricky Vargas, ang pagluluwag sa requirements ay magsisimula sa susunod na season.
“If you can still remember, we had a study group to look at some of the changes and update the policies of the board and one of them is about the Fil-foreigners,” pahayag ni Vargas sa online edition ng Philippine Sportswriters Association (PSA) Forum kahapon.
“We will basically look at Fil-foreigners less stringently now,” anang TnT governor. “As long as they have Filipino blood and they can get their passport, they are able to come and play for us, we will look at them with less rules to disqualify them.”
Dati, ang Fil-foreigners na nais lumahok sa PBA Rookie Draft ay hinihingan ng maraming requirements, kabilang ang Philippine passport, Certificate of Recognition as Filipino Citizen mula sq Bureau of Immigration at Affirmation of Recognition as Filipino Citizen mula sa Department of Justice.
Ang mga requirement na ito ang dahilan kung kaya hindi nakasama ang mga tulad nina Jason Brickman, Jeremiah Gray, at Brandon Ganuelas-Rosser sa Season 46 Draft noong nakaraang Marso.
Sa pagluluwag sa league rules, sinabi ni Vargas na makahihikayat ang PBA ng mas maraming players para maglaro sa liga.
“We’ll bring the world to the PBA like the NBA, but at the same time try to also balance it so that we’ll also be able to give jobs to our players who are here,” ani Vargas.
“We’re looking forward to that in the next draft. We understand that a lot of Fil-foreigners are interested in coming over and playing for the PBA.”
Idinagdag pa ni Vargas na tinaasan din nila ang limit ng Fil-foreigner players na maaaring maglaro kada koponan sa pito mula sa lima.
“We said that a team is allowed to have at least seven Fil-foreigners. In that way, we will make the PBA more exciting.”
