(Sa pagsasara ng mga paaralan) TRILYON-TRILYONG PISO MAWAWALA SA EKONOMIYA

NABABAHALA si Senador Win Gatchalian sa tinatawag niyang posibleng “education at economic scars” na maaaring idulot ng pagsasara ng mga paaralan dahil sa pandemya ng COVID-19.

Isinusulong ni Gatchalian ang pilot testing ng limited face-to-face classes sa mga low-risk area.

Sa briefing ng Development Budget Coordinating Committee (DBCC) sa panukalang 2022 National Expenditure Program (NEP), ibinahagi ni Gatchalian ang 2020 report ng Asian Development Bank (ADB) kung saan tinatayang nagdulot ng pagkawala ng P1.9 trilyon o katumbas ng higit 10 porsiyento ng Gross Domestic Product (GDP) ang pagsasara ng mga paaralan noong School Year 2020-2021.

“Hindi lamang ang mag-aaral ang nakararanas ng ‘education scarring’, pati ang ekonomiya natin napipinsala dahil sa productivity losses,” ani Gatchalian sa matagal nang pagsasara ng mga paaralan.

Ayon kay Socioeconomic Planning Secretary Karl Chua, nilinaw ng National Economic and Development Authority (NEDA) ang mga numerong ito sa ADB. Sinabi ng ADB na maaaring mas mataas pa ang halaga ng pinsalang idinulot ng mahigit isang taon na pagsasara ng mga paaralan.

Sa pagtaya naman ng NEDA, P11 trilyon ang maaaring mawala sa bansa sa susunod na 40 taon dahil sa pagsasara ng mga paaralan.

Ibinahagi rin ni Gatchalian ang iba pang mga resulta sa pag-aaral ng ADB. Para sa mga mag-aaral ng K-12, ang kasalukuyang halaga ng nawalang productivity ay P1.68-T. Kung kalahati (50%) naman o 200,000 sa 410,000 guro at kawani ng mga pribadong paaralan ang nawalan ng trabaho, ang kawalan ng sahod noong School Year 2020-2021 ay tinatayang aabot sa P16 bilyon.

Dahil may isang nakatatandang kina­kailangang umalalay sa mga mag-aaral sa kanilang distance learning, 11 porsiyento ng workforce ang kinailangang huminto sa trabaho. Ito ay nagdulot ng pagkawala ng P225 bilyon sa ekonomiya.

“Naniniwala ako na ‘yung iba nating mga mag-aaral ay hindi na makakabalik sa mga paaralan dahil noong nakaraang taon, may halos dalawang milyong mga mag-aaral ang nag-drop out, kabilang ang mga mag-aaral sa Alternative Learning System. Ikina-katakot ko na baka hindi bumalik ang mga mga mag-aaral na ‘to sa ating paaralan at mapipinsala nito ang ating workforce,” pahayag ng chairman ng Senate Committee on Basic Education, Arts and Culture.

Dahil naman napabilis ng pandemya ang pagpapalawig sa paggamit ng teknolohiya, binigyang-diin ni Gatchalian na kinakailangan ang mga programa upang matulungan ang sektor ng pagnenegosyo lalo na ang micro, small, and medium enterprises (MSMEs) na maging handa para sa post-COVID economy. Kabilang, aniya, sa mga kinakailangang programa ang upskilling ng mga manggagawa. VICKY CERVALES

Related posts:

(Maibabalik sa pagtatapos ng 2022) PRE-PANDEMIC LEVELS NG EKONOMIYA (Sa pagbaba sa Alert Level 2 ng NCR) P10.3-B DAGDAG SA EKONOMIYA KADA LINGGO PATULOY NA PAGBANGON AT PAGPAPALAGO NG EKONOMIYA SA KABILA NG PANDEMYA PH ECONOMY LUMAGO NG 7.1% SA Q3 (Ipagkakaloob ng DepEd) SAFETY SEAL SA SCHOOLS (Sa pagtaya ng NY-based think tank) PH ECONOMY LALAGO NG 5.5% BUSINESS, CONSUMER CONFIDENCE (Tumaas sa gitna ng bumubuting ekonomiya) (‘Best defense’ ng ekonomiya ng bansa) AGRI SECTOR PALAKASIN