SALCEDA, GINAWARAN NG PINAKAMATAAS NA ‘DANGAL AWARD’ NG NDRRMC SA KANYANG ‘DISASTER RESILIENCE ADVOCACY’

Ginawaran ng parangal si Albay 2nd District Rep. Joey Sarte Salceda ng National Disaster Risk Reduction and Management Council (NDRRMC) kaugnay sa kanyang  natatanging dedikasiyon at mga ini­siyatibo sa larangan ng ‘disaster risk reduction management’ at kanyang adbokasiya para maging matibay ang mga pamayanan laban sa lupit ng nagbabagong panahon.

Iginawad kay Salceda ang  “Dangal ng Pilipino sa Pagtataguyod ng Pribado at Pampublikong Katatagan” ni Undersecretary Ariel F. Nepomuceno, na pinuno ng Office of Civil Defense (OCD) at Executive Director ng NDMRRC sa ‘Award Hall of Fame’ o Bulwagan ng Parangal ng ‘Philippine Disorder Resilience Champions’ sa pagtatapos ng pagdiriwang ng ‘36th National Disaster Resi­lience Month (NDRM)’ nitong Hulyo 31 sa Camp Aguinaldo, Quezon City.

Itinatag ng NDRRMC ang ‘Dangal Bantayog ng Katatagan award’ bilang pinakamataas na parangal ng Pilipinas kaugnay sa mahusay at mabisang pa­ngangasiwa sa pananalasa ng panahon, at inilunsad ito noong nakaraang taon. Layunin nito na kilalanin ang mga natatanging mga ambag ng sinuman na magbibigay ng mabisa at pangmatagalang epekto sa sistema ng DRRM ng bansa.

Tinukoy ng para­ngal ang mga natatanging mga ambag ni Salceda sa DRRM, kasama  ang pagtatag niya ng ‘Albay Public Safety and Emergency Management Office (APSEMO)’ at Climate Change Academy sa Albay.

“Sa ilalim ng kanyang (Salceda) pamumuno bilang gubernador, tumang­gap din ang kayang lalawigan ng ‘Galing Pook Award for Outstanding Governance Program on Disaster Preparedness’ at ‘Gawad Kalasag Hall of Fame Award for Best Disaster Risk Reduction and Management Council’ sa loob ng magkakasunod na tatlong taon,” ayon sa pahayag ng parangal.

Kinilala rin sa mundo ang mga natata­nging ambag ni Salceda sa DRRM. Pinarangalan siya bilang ‘First Senior Global Champion of Disaster Risk Reduction and Climate Change Adaptation’ ng ‘United Nations International Strategy for Disaster Reduction (UN-ISDR)’ at itinalaga siyang kauna-unahang Asianong kagawad ng ‘Board of the Green Climate Fund (GCF).’

Batay sa itinalaga niyang ‘zero-casualty principle,’ masugid niyang isinulong at ipinatupad ang mahahalagang prog­rama na naglalayong lalong pahusayin at patibayin ang kakayahan ng mga pamayanan laban sa banta at pananalasa ng nagbabagong panahon, at makamtan nila ang tuloy-tuloy na pag-unlad, sa panunungkulan niya bilang gobernador ng Albay sa loob ng siyam (9) na taon. At kahit bilang mambabatas ng Kamara, marami sa kanyang mga pagsisikap ay itinuon niya sa proteksiyon ng kalikasan at tuloy-tuloy na pagsulong ng bansa, ayon sa parangal.

Idinagdag pa ng pahayag ng parangal na ang dedikasiyon ni Salceda sa pagpapahusay sa kakayahan ng mga pamayanan sa DRRM ay sadyang kahanga-hanga at dapat pamarisan ng iba.