SCARLET BELO, CARTOON NETWORK NAKIPARTNER SA DOT

MAGKAPARTNER ang Department of Tourism (DOT) at Cartoon Network ng WarnerMedia upang hikayatin ang lahat na maglakbay ng ligtas sa bansa ngayong maluwag na ang travel restrictions.

Bida ang anak ni Vicki Belo na si Scarlet Snow Belo sa S.A.F.E.T.R.I.P. campaign video na humihingi ng tulong sa Powerpuff Girls na gumawa ng paraan upang makapaglakbay ng ligtas sa Pilipinas ngayong pwede nang mag-leisure travel sa bansa.

Binigyang diin nina Blossom, Bubbles, at Buttercup na kailangang sundin ang S.A.F.E.T.R.I.P., na ang kahulugan ay Sanitize, Avoid mass gatherings, wear Face masks, use Electro­nic payments, always have your Temperature checked, follow Rules and regulations, stay updated on latest Information, at observe Physical distancing.

Ayon kay Tou­rism Secretary Berna Romulo-Puyat, marami nang bukas na tourist destination sa bansa at tungkulin ng DOT na paalalahanan ang lahat na mag-travel ng ligtas.

Sa huling pagbisita sa Bohol, dinala ni Puyat si Scarlet kasama ang kanyang mga magulang na sina Vicki Belo at Dr. Hayden Kho. Binisita nila ang mga maga­gandang tanawin tu­lad ng Chocolate Hills at ang Philippine Tarsier Foundation’s sanctuary. Dinalaw rin nila ang Dalareich Chocolate House, isang award-winning bean-to-bar chocolatier. Sinubukan din nila ang Loboc River cruise habang hinaharana ng sikat na Loboc Children’s Choir sa Loboc River Resort.– NV