SCHOLARSHIP PROGRAM NG NATIONAL PRESS CLUB PATULOY

SA KABILA nang nararanasang pandemya dulot ng COVID-19, hindi naging hadlang at nagpapatuloy ang scholarship program subsidy ng National Press Club sa mga anak ng mga maralitang miyembro nito.

Sa idinaos na simpleng seremonya, ipinagkaloob ng NPC ang tatlong semestreng scholarship fund para sa 13 estuduyante na pawang mga nasa kolehiyo.

Apat sa mga scho­lars ay tumanggap ng ₱15,000 bawat isa, mayroon ding tig-sampung libong piso habang ang mga bagong scholar ay tumanggap ng limang libong piso.

Hinikayat ni NPC President Paul Gutierrez ang mga estudyante na pagbutihin ang pag-aaral at sikaping makapasa.

Sinabi ni Gutierrez na walang mataas na grade requirement na itinatakda sa bawat scho­lar kundi ang maipasa lamang ang kanilang kurso.

Paalala ni Gutierrez na sa sandaling magkaroon ng failing grades ang isang scholar ay matatanggalan ito ng subsidiya.

Kaugnay nito, lubos namang nagpasalamat ang NPC sa ACT-CIS Partylist at kay TV broadcaster Erwin Tulfo sa pagbibigay nito ng tulong pinansiyal sa NPC upang mapondohan ang subsidiya para sa mga naturang estudyante.

Nabatid kay Gutierrez na ipagpapatuloy ng ACT-CIS Partylist at Tulfo ang pagtulong sa naturang programa ng NPC hanggang sa makapagtapos sa kolehiyo ang 13 estudyante.

Samantala, inanunsiyo ni Gutierrez na bukas na ang pagtanggap ng NPC sa mga application para sa panibagong scholarship/subsidy ngayong taon. BENEDICT ABAYGAR