PINASUKO ni Dondon Serrano si Richard Redman sa main event sa Universal Reality Combat Championship (URCC) Bare Knuckle bout na sinaksihan ni bagong Games and Amusement Board (GAB) Chairman Atty. Richard Clarin kamakailan sa Royal Night Club sa Makati.
Hindi pinaporma at pinaulanan ng kaliwa’t kanang suntok ng 31-anyos na Cebuano ang kanyang kalaban at tinapos ang laban sa loob lamang ng 11 segundo sa first round ng three- round main event.
Matapos pasukuin si Redman, hinamon ni Serrano si Allan Wycoco na matapang namang tinanggap ng taga-Nueva Ecija street fighter para malaman kung sino sa kanila ang best pound-for-pound fighter.
Sa iba pang aksiyon ay tinalo ni Wycoco si Stephen Atok sa pamamagitan ng technical knockout habang namayani si Leonard Pornia laban kay Jeffrey Subia, gayundin si Marvin Malunes kontra Wilson Managuio.
Nanalo rin ang kapatid ni World Wushu at SEA Games champion Rene Catalan na si Edemer Catalan laban kay Rexer Likoc at pinatulog ni Jovannie Bualan si Mark Sadang.
Ang torneo ay inorganisa ni URCC president at founder at Wrestling of the Philippines head Alvin Aguilar.
CLYDE MARIANO
