SSL: LA SALLE-ADAMSON TITLE SHOWDOWN SIMULA NA

UMPISA na ang kapana-panabik na sagupaan sa pagitan ng La Salle at Adamson sa 2023 Shakey’s Super League (SSL) National Invitationals finals ngayong Miyerkoles sa Filoil EcoOil Centre sa San Juan

Nakatakda ang Game 1 ng best-of-three finals series sa alas-4 ng hapon.

Ang magwawagi ay lalapit sa pagiging maiden national champion ng SSL, na idinadaos sa pakikipagtulungan ng Commission on Higher Education (CHED).

Mauuna rito ang bakbakan ng University of Santo Tomas at University of Perpetual Help System Dalta sa alas-2 ng hapon para sa bronze medal, na mayroon ding best-of-three format.

Bagama’t paboritong manalo ang La Salle, na pinangungunahan ni seasoned mentor Ramil de Jesus at reigning UAAP champions, ang Adamson, tumapos sa ikatlong puwesto sa UAAP, ay puno ng kumpiyansa sa ilalim ng kanilang bagong coach na si JP Yude matapos ang impresibong paglalakbay patungo sa finals.

Umabante ang Lady Spikers sa finals makaraang malusutan ang UST sa limang sets, habang ang Lady Falcons ay ‘flawless’ sa buong 12-team SSL tournament, kung saan hindi ito natalo sa kahit isang set. Ang kanilang impresibong run ay kinabibilangan ng panalo kontra Perpetual sa semifinal matchup.