TAX CREDIT SA HOTELS, MOTELS NA TUMULONG SA HEALTH FRONTLINERS

BILANG pagtanaw ng utang na loob ng pamahalaang lungsod, bibigyan ng P100,000 tax credit ang lahat ng establisimiyento na nagpatuloy o nag-accommodate sa lahat ng health frontliners ng Maynila.

Kabilang dito ang hotels, motels, inns, apartelles, lodging houses at iba pang kauri nito.

Ito ang inanunsiyo  ni Ma­yor Isko Moreno sa first directional meeting kasama ang mga hepe ng bureaus, departments at iba pang tanggapan simula nang alisin ang enhanced community quarantine.

Ayon sa alkalde, ang business tax credit na nagkakaha­laga ng P100,000 ay simpleng token ng pamahalaang lungsod sa kusang loob na tulong na ipinagkaloob ng mga business establishment sa lahat ng medical personnel na nasa frontlines ng pakikidigma kontra ­COVID-19.

Sinabi ni Moreno na sinigurado na sa kanya ni  Vice Mayor Honey Lacuna, na kasama rin nila sa meeting at kasalukuyang council presiding officer, na agad nilang ipapasa sa city council ang ordinansang nagbibigay ng  tax  credit sa lahat ng nabanggit na mga establisimiyento.

Sa oras na maipasa na sa konseho ang ordinansa ay agad na pipirmahan ito ni Moreno  upang  maging batas at mai-publish para agad na maipatupad.

Ayon kay Business Permits and Licenses Office chief Levy Facundo, may  19 na establisimiyento na nag-accomodate sa mga health frontliner, hindi pa kasama rito ang dormitoryo, dahil inaalam pa ang tamang bilang nito.

Samantala ay inatasan naman ni Moreno si  City Administrator Felix Espiritu na mamahagi ng non-contact handwashing basins o malalaking palanggana sa mga public market ng lungsod.

Aniya, sa ganitong pa­raan ay maeengganyo ang mga namamalengke at mga taga-palengke na palagiang maghugas ng kamay bago pumasok at lumabas ng palengke.

Si Moreno ay palagiang nagpapaalala sa publiko na mahigpit  na obserbahan ang  mga protocol kontra COVID-19 tulad ng pagsusuot ng face mask, madalas na paghuhugas ng kamay at  social distancing.  VERLIN RUIZ