NORTH COTABATO – PINABULAGTA ang 36-anyos na may-ari ng boarding house matapos itong ratratin ng hindi kilalang lalaki sa bahagi ng Purok 6A, Brgy. Lanao, Kidapawan City, noong Biyernes ng gabi.
Anim na bala ng cal. 45 pistol ang tumapos sa buhay ng biktimang si Nino Abellanosa Lagria ng bayan ng Bansalan, Davao del Sur.
Base sa police report, ipaparada na sana ng biktima ang kanyang SUV sa gate ng boarding house nang lapitan at ratratin ng gunman dakong alas-9 ng gabi.
Natulala naman ang live-in partner ng biktima matapos nitong masaksihan ang pamamaslang sa negosyante habang tumakas naman ang gunman sakay ng motorsiklo.
Narekober sa crime scene ang anim na basyo ng cal. 45 pistol habang hindi naman isinasantabi ng pulisya ang anggulong may kinalaman sa love triangle ang krimen. MHAR BASCO
