TRAVEL BAN SA TAIWAN INALIS NA

INALIS na ng Filipinas ang travel ban sa Taiwan kaugnay sa pagsisikap na maiwasan ang pagkalat ng Coronavirus Disease-2019.

Inanunsiyo ni Presidential spokesperson Salvador Panelo  na ang pasya ng Palasyo ay makaraan ang pagpupulong  sa Inter-Agency Task Force for the Management of Emerging Infectious Diseases (IATF)  kahapon.

“Accordingly, travel may now be made by any national to Taiwan from the Philippines and vice versa,” pahayag ni Panelo.

Ang lifting ng travel ban ay napagkasunduan   ng mga miyembro  ng  IATF habang pag-aaralan din  ang  posibleng pag-aalis  ng travel ban sa  ibang lugar, katulad ng Macau.

Sakop din ng travel ban  ng COVID-19 ang mainland China  at Hong Kong.

Binigyang-diin naman ng Office of the President  na ang anumang  resolusyon kaugnay sa  pagbabawal magbiyahe  kaugnay sa nasabing sakit  ay  kailangang dumaan sa masusing pagsusuri ng IATF.

Kamakalawa ay tinatalakay na ng gobyerno ng Taiwan ang  tila pagganti sa Filipinas  dahil sa ginawang pag-ban sa kanilang bansa na makabiyahe ganoon din ang papalabas ng Filipinas. Kabilang sa maaring gawin ng Taiwan ay ang pagkansela ng visa-free entry  para sa  mga Filipino na resulta ng travel ban.

Iginiit din ng mga ito na sila ay state na independent sa China na pinagmulan ng nasabing virus.

Nilinaw naman ng Palasyo na  ang  kaligtasan ng mamamayang Filipino at hindi politika ang dahilan ng ipinatupad na temporary travel ban sa Taiwan. PILIPINO MIRROR REPORTORIAL TEAM