DAVAO DEL SUR – MAGKASAMANG sinalubong ni kamatayan ang mag-inang sakay ng traysikel makaraang salpukin ng van sa kahabaan ng Davao-Cotabato national highway, sa Brgy. Coronon, bayan ng Sta. Cruz noong Linggo ng gabi.
Batay sa police report, sakay ng tricycle na minamaneho ni Justin Villaflor, 24, ang mag-inang sina Rhea Mae Debain Sanchez at isang taong gulang na anak na si Justia Villaflor, pawang nakatira sa Sitio Lubo, Brgy. Zone 1 ng nasabing lugar.
Gayunman, nakasalpukan ng trike ng mga biktima ang van (MEJ 829) na minamaneho ni Erwin Amores Bituin ng Brgy. Mintal, Davao City kung saan nadamay ang isang motorsiklo na minamaneho ni Arnold Pezon, 40.
Pahayag ng mga nakasaksi na matulin ang takbo ng van subalit biglang lumampas sa kabilang linya kaya nabangga ang dalawang sasakyan.
Agad namang dinala ang mga biktima sa Davao del Sur Provincial Hospital subalit ang mag-ina na sakay ng trike ay idineklarang patay habang nakapiit na ngayon ang drayber ng van. MHAR BASCO
Comments are closed.