TULAK ARESTADO SA BUY BUST

NAVOTAS CITY – ARESTADO ang isang garbage collector na tulak ng ilegal na ­droga sa isinagawang buy bust operation ng mga pulis kamakalawa ng gabi.

Kinilala ni Navotas police chief Sr. Supt. Brent Milan Madjaco ang naarestong suspek na si Angelo Arnejo alyas “Monyo”, 41, ng 423 V. Cruz, Brgy. ­Tangos.

Ayon kay Sr. Supt. Madjaco, dakong alas-11 ng gabi nang isagawa ng mga operatiba ng Station Drug Enforcement Unit (SDEU) sa pangunguna ni PSI Mark Flores ang buy bust operation kontra sa suspek sa labas ng kanyang bahay.

Si PO2 Danilo Caimol ang umaktong poseur-buyer na nagawang makipag­transaksiyon sa suspek ng dalawang plastic sachet ng shabu na nagkakahalaga ng P1000.

Matapos iabot ni Arnejo ang shabu sa police poseur-buyer kapalit ng marked money ay agad itong sinunggaban ng mga operatiba.

Nang kapkapan, nakuha pa kay Arnejo ang anim na plastic sachet na naglalaman ng hindi pa matukoy na halaga ng hinihinalang shabu, buy bust money at P300 cash.

Karamihan umano sa mga parokyano ng suspek ay mga mangingisda na amidong isang buwan ng nagbebenta ng droga dahil madali umanong pagkakitaan.                        EVELYN GARCIA