TULONG MUNA BAGO IMBESTIGA

DAPAT na tulungan muna ng Kongreso ang mga sina­lanta ng pagsabog ng Bulkang Taal bago ang imbestigasyon sa sinasabing mga naging pabaya sa pagbibigay ng babala tungkol sa naturang pagsabog.

Sa kanyang ‘Aide Memoire’ kina House Speaker Alan Peter Cayetano at Majority Leader Martin G. Romualdez, hinimok ni Albay Representative at House Ways and Means Committee chairman Joey Sarte Salceda ang mga kapwa niya mambabatas na tugunan muna ang mga pangangailangan ng mga nasalanta kaysa panukalang imbestigahan ang Phivolcs dahil diumano sa atrasadong babala nito kaugnay sa pagputok ng bulkan. “Tumulong muna tayo. May tamang pa­nahon para sa imbestigas­yon,” dagdag niya.

“May natatanging kaka­yanan ang Kamara na tumulong sa pangangalap ng ayuda para sa mga sinalanta. Maaa­ring gamitin ng mga mambabatas ang kanilang mga Congressional district offices bilang tipunan ng mga ayuda mula sa publiko at pagbibigay kaalaman at tulong sa mga biktima ng kalamidad. Bukod pa ito sa mahalagang kapangyarihan ng Kamara na bumalangkas ng mga panuntunan at programa sa mabisang pagtugon sa mga kalamidad,” paliwanag ni Salceda, isang kilalang eksperto sa panga­ngasiwa sa mga kalamidad

Nanawagan ito  na isabatas agad ang panukalang paglikha ng Department of Disaster Resilience (DDR) na akda rin niya. Pasado na ito sa Kamara at naghihintay ng aksiyon ng Senado. Panukala rin niyang suportahan din ang hihilinging tulong ng Malakanyang para tugunan ang naganap na malawakang pananalasa ng Bulkang Taal. “Kasama rito ang panukalang paglikha ng Taal Eruption Recovery, Rehabilitation and Adaptation (TERRA) Plan,” na poponduhan  ng P60 bil­yon hanggang P100 bilyon. Ito’y batay sa ‘building back better forward principle’ na ang layunin ay hindi lamang maibalik ang dating kaayusan ng mga pamayanan kundi tiyakin ang kanilang makabuluhang pagsulong lalo na at malapit lamang ang mga ito sa Kamaynilaan.

Para sa pangmatagalang istratehiya sa mabisang pagtugon sa mga kalamidad, panukala ni Salceda na ipaloob ng Kongreso sa DDR ang “’all-of-nation’ convergences approach for disaster resilience,” at kasama rito ang ‘calamity insurance’ na dapat din  na talakayin agad ng Kamara.

Binigyan niya ng diin ang kahalagahan ng DDR  para sa madali  at nakatuong pagbabantay. Sa kasalukuyan, ang pagbabantay ng Phivolcs at Pa-gasa ay isa lamang sa mga atas ng kanilang ‘mother agency,’ ang Department of Science and Technology (DOST) kaya ito’y nasa  ‘sub-cabinet’ na antas lamang, pati na ang laang suporta at atensiyon.