CEBU- Para mabawasan ang single-use plastic waste, ipamimigay ang mga tumbler sa mga atleta sa Palarong Pambansa sa Hulyo sa halip na mga disposable water bottle.
Ito ay matapos lumagda ang Cebu City Government sa isang Memorandum of Agreement sa Department of Education (DepEd), ayon kay Cebu City Acting Mayor Raymond Alvin Garcia nitong Lunes.
Sinabi ni Garcia sa isang press conference na magiging kapaki-pakinabang ang pagkakaroon ng mga tumbler dahil hindi na kailangang gumamit ng mga plastic bottle na magdudulot ng polusyon sa mga lugar tulad ng mga ilog.
“Kaya maganda na ibinibigay natin itong mga tumblers para maging environment friendly. And we want to show to people na we are aware of such and that we are practicing as such well,” ani Garcia.
Idinagdag din ng acting mayor na bibilhin ng pamahalaang lungsod ang mga tumbler at ang DepEd ang mamimigay nito sa mga atleta.
RUBEN FUENTES
