WANTED SA DRUG TRADE DEDO SA SHOOTOUT

SULTAN KUDARAT – BUMULAGTA ang top 10 most wanted sa drug trade sa Tacurong City matapos itong manlaban sa mga operatiba ng pulisya at Phil. Army sa inilatag na anti-illegal drugs operation sa Barangay Angkayamat, Sultan sa Barongis, Maguindanao kamakalawa ng hapon.

Nauwi sa barilan ang ikinasang anti-illegal drugs operation ng mga pulis at sundalo laban sa suspek na si Podzak Akmad Mopak sa Barangay Angkayamat sa nasabing bayan.

Nagkahabulan pa ang suspek at ang awtoridad ng Bravo Barracuda Company hanggang sa magkapalitan ng putok.

Gayunman, sinubukan pang isugod sa ospital sa Buluan, Maguindanao ang suspek pero idineklarang patay na.

Nabatid na may dalawang warrant of arrest si Mopak kaugnay sa drug trade at illegal possession of firearms.

Narekober kay Mopak ang isang cal. 45 pistol, magazine at mga bala, cellphone, drug paraphernalia at anim na plastic sachets ng shabu. MHAR BASCO