2 ARESTADO SA DRUG BUY BUST

MALABON CITY– DALAWANG hinihinalang drug personalities ang nasakote sa  buy bust operation ng mga pulis sa Malabon City.

Kinilala ni Malabon Police Chief P/Col. Jessie Tamayao ang mga naarestong suspek na si Amado Sobiono Jr., 35 at Aldon Bolocon, 24, kapwa ng Phase 2 Area 2 Brgy. Longos.

Ayon kay PSSg Ramos Timmago, alas-12:30 ng madaling araw nang isagawa ng mga operatiba ng Malabon Station Drug Enforcement Team (SDET) sa pangunguna ni P/Capt. Johnny Baltan, kasama ang PDEA Camanava ang buy bust operation kontra kay Sobiono sa Blk 1 Pampano St., corner Hiwas St., Brgy. Longos.

Nagawang makaiskor kay Sobiono ng isang sachet ng shabu ng isang pulis na nagpanggap na buyer kapalit ng P300 marked money at nang magkabayaran na agad sumugod ang back-up na mga operatiba saka sinunggaban ang suspek, kasama si Bolocon.

Nakumpiska kay Sobiono ang pitong plastic sachets na naglalaman ng hinihinalang shabu at buy bust money habang nakuha naman kay Bolocon ang tatlong sachets ng hinihinalang shabu. EVELYN GARCIA