NAVOTAS CITY – NASAKOTE ang dalawang mangingisda na hinihinalang sangkot sa pagtutulak ng ilegal na droga sa isinagawang buy bust operation ng mga pulis kahapon ng madaling araw.
Kinilala ni Navotas Police Chief P/Col. Rolando Balasabas ang mga naarestong suspek na si Antonio Adriano alyas “Toti”, 44 at Mark Sengson, 24, kapwa ng Brgy. Tangos North.
Ayon sa ulat, alas-2:35 ng madaling araw nang ikasa ng mga operatiba ng Station Drug Enforcement Unit (SDEU) sa pangunguna ni P/Lt. Eric Roxas ang buy bust operation kontra sa mga suspek sa 114 M. Domingo St. Brgy. Tangos North kung saan nagawang makapagtransaksyon ng isang sachet ng shabu sa dalawa ni P/Cpl. Raymund Nagal na nagpanggap na buyer.
Nang tanggapin na ng mga suspek ang P300 marked money mula sa poseur-buyer kapalit ng isang sachet ng shabu, agad lumapit ang back-up na si PSSgt. John Mikhail Garces saka inaresto ang dalawa.
Nang kapkapan, narekober sa mga suspek ang buy bust money at walong plastic sachets na naglalaman ng hinihinalang shabu. EVELYN GARCIA/ VICK TANES
Comments are closed.