NAVOTAS CITY – PITONG hinihinalang drug personalities ang naaresto sa isinagawang buy bust operation ng mga pulis sa Navotas City, kahapon ng madaling araw.
Ayon kay Navotas Police Chief Sr. Supt. Ramchrisen Haveria Jr. unang ikinasa ng mga operatiba ng SDEU sa pangunguna ni PSI Mark Flores ang buy bust operation kontra sa listed drug pusher na si Mark Ramil alyas “Tyanak”, 24 ng Brgy. NBBS sa Market 3, Brgy. NBBN alas-4 ng madaling araw.
Nagawang makabili ng isang plastic sachet ng shabu ng isang police na nagpanggap na poseur buyer kay Tyanak kapalit ng P300 marked money at nang magkaabutan ay agad lumusob ang mga nakaantabay na operatiba at inaresto ang suspek.
Narekober kay Tyanak ang buy bust money habang nadakip din si Reymundo Forio, 53, ng Brgy. NBBN at Ronito Encarnation, 29, ng Guiguinto, Bulacan matapos makuhanan ng dalawang plastic sachet ng hinihinalang shabu, samantala nakuha naman kay Wilmar Ramil, 32 ang isang cal. 40 pistol na may 8 bala matapos gumawa ng kaguluhan.
Alas-4:45 naman ng madaling araw nang maaresto rin ng mga operatiba sa buy bust operation sa Market 3, ang dalawang drug pusher na si Lordy Lopez, 31, at Arman Joshua Santos, 20.
Narekober sa mga ito ang tatlong plastic sachets ng shabu at P400 buy bust money habang ang isang cal. 22 magnum ay nakumpiska kay Lopez.
Dinakip din si Benny Tomas, 23, matapos makuhanan ng isang plastic sachet ng shabu. EVELYN GARCIA
Comments are closed.