(Amid COVID-19) HERBERT BAUTISTA BALIK SA COMMUNITY SERVICE

SA PANAHON ngayon na sumasailalim sa enhanced community quarantine o lockdown ang buong bansa, naghahanap ang mga mamamayan ng mga lider na maaasahan nila sa panahon ng krisis.

Para sa kanyang mga dating constituents, naging kasangga na nila noon ang dating  Quezon City Mayor Herbert Bautista sa panahon ng kanilang mga pangangailangan.

Bihira na rin kasi ang tulad ni Bistek na inilaan na ang kanyang buhay sa serbisyo publiko.

Kahit nga noong nawala na sa kanyang poder ang aktor-pulitiko, patuloy pa rin siyang tumutulong at kumakaIinga sa mga kapus-palad niyang kababayan.

Maging ang entertainment press, mahal na mahal si Herbert dahil hindi siya nakakalimot sa mga ito.

May sarili kasing kusa ang Make It With You star, bagay na minana niya sa kanyang yumaong tatay.

Kamakailan, marami ang natuwa sa ibinahagi niyang post sa kanyang socmed account hinggil sa pagbabalik sa community service bilang commanding general 1502nd Ready Reserve IB PH Army sa kabila ng banta ng COVID-19.

Sa nasabing larawan, nasa Tandang Sora siya na tinaguriang ground zero area sa Quezon City.

“Blessed to be serving as the Commanding General of the 1502nd Ready Reserve IB PH Army for my beloved city,” aniya.

Bahagi ng duty ng kanyang team ang magsagawa ng “round the clock inspection” sa borders para pangalagaan ang kaligtasan ng siyudad at siguraduhing nakararating ang relief goods sa kanyang mga constituents.

Hinikayat din ng tsinitong aktor ang lahat na manatili na lamang sa kanilang mga tahanan para maka-bonding ang kanilang mga pamilya at para na rin sa kanilang pangkalahatang kaligtasan.

 

ISABEL OLI AT JOHN PRATS SABIK NA SA KANILANG 3RD BABY

KAHIT naka-home quarantine, may rason para magdiwang ang mag-asawang John Prats at Isabel Oli.

Naghihintay kasi ang showbiz couple sa pagdating ng kanilang third baby na buong pananabik na ibinahagi ni Isabel sa kanyang socmed account.

“We will be welcoming another bundle of joy, Baby Pratty number 3 this July 2020!!!”,aniya. “In the thick of what’s happening, don’t forget to still count your blessings. We happened to have one big blessing that we all would like to share to you,” dugtong niya.

Puring-puri naman si Isabel ng netizens na sa kabila ng kanyang pagbubuntis ay di nabawasan ang ganda.