COLLEGE DROPOUT NAG-TESDA, WELDER NA SA JAPAN

ISANG college dropout si Anthony Jay Velasco, 28, residente ng Brgy. San Pablo Manapla, Negros Occidental. Upang makakuha ng trabaho, naisipan ni  Anthony Jay na kumuha ng technical-vocational training na  Shielded Metal Arc Welding (SMAW) NC l. Masuwerte siyang napiling welder sa bansang Japan na may sahod na P45,000 kada buwan.

First year college lang ang  natapos  ni Anthony Jay dahil kapos ang kanyang mga magulang upang suportahan ang kanyang pag-aaral. Nang matigil sa  pag-aaral, tumulong siya sa maliit na buy and sell business ng kanyang ama, pero nagkasakit ang huli at namatay noong June 2016.

Nang malaman niya na mayroong scholarship program na SMAW NC l  ang Technical Education and Skills Development Authority (TESDA), nagdesisyon si Anthony  Jay na mag-training upang mapahusay at madagdagan ang mga kaalaman niya  lalo na  sa welding.  Alam niyang magagamit ito sa kanyang pag-a-apply sa ilang  construction companies. Makatutulong din siya sa kanyang pamilya sakaling matanggap sa trabaho.

Aniya, itinuro sa kanila ng TESDA ang tamang kaalaman, kasa­nayan at  pag-uugali  na siya umanong mahalaga kung mag-a-apply  ng trabaho sa abroad.

Pagkatapos ng kanyang skills training, tumatanggap na siya ng mga welding jobs sa kanilang barangay sa Manapla, ­Negros.

Noong April 2019, isa siya sa masuwerteng napiling welders ng  Kado Fujita Co. LTD sa  Japan.  Ngayong Agosto, 2019, magsisimula na siya ng kanyang training sa Basic Japanese Language, Ethics and Culture sa POWER Foundation, isang TVET provider at pagkatapos ng  language training, pupunta na si Anthony Jay  sa Japan bilang welder sa Okayama City,  Okayama Prefecture, Japan.

Bilang welder sa Japan na may monthly salary na P45,000, masusuportahan  na nito ang pag-aaral ng kanyang anak at pa­ngangailangan ng kanyang pamilya.  Kapag nakaipon, plano ni Anthony Jay  na mag-tayo ng  welding shop  upang makatulong sa iba, sa pamamagitan ng  trabaho.