DATING GOLD AWARDEE SA WORLDSKILLS BANGKOK, TANGGAP SA JAPAN BILANG WELDER;  MGA PANGARAP NATUTUPAD NA!

TINAWAG siyang “Pride of the Mansaka Tribe.”

Ganito ipinagmalaki si Heinrich M. Omlaan, 22,  hindi lamang ng kanyang  tribu kundi ng buong bansa dahil sa iniuwi nitong mga para­ngal sa kanyang pagsali  sa iba’t ibang kumpe­tisyong pang-international at lokal sa Wel­ding  Category  habang  nagsasanay  sa kinuha nitong  technological-vocational course na 2-year Diploma in Welding Technology. Isa rito, ang tinanggap niyang   gold award sa 2017 Vis-Min Zonal Skills Competition,  Welding Category  at isa rin siya sa walong  Filipino competitors  sa idinaos na Association of Southeast Asia Nations (ASEAN) Skills Competition “WorldSkills Bangkok 2018”  sa Bangkok, Thailand na tumanggap ng  Medallion for Excellence award sa nasabi ring  larangan.

Sa kasalukuyan, si Heinrich ay nag-aaral ng Japanese Language  bilang paghahanda sa kanyang deployment  bilang overseas Filipino worker (OFW) matapos siyang matanggap na welder sa  Uzushio Electric Co. Ltd., BEMAC, Japan.

Si Heinrich ay kabilang sa Mansaka Tribe, isa sa grupo ng mga  katutubong  matatagpuan sa Compostela Valley at  Davao del Norte. Siya’y  taga-Compostela Valley at pangatlo sa limang magkakapatid. Pagsasaka ang  hanapbuhay ng kanyang mga magulang,  kaya hirap ang mga  ito para tustusan ang kanilang pang-araw-araw na pangangailangan at  pag-aaral ng mga anak.  Simula bata, pangarap na  ni Heinrich  na magkaroon ng magandang buhay at matulungan ang kanyang pamilya.

Pagkatapos  ng  high school,  isang taon siyang  natigil sa pag-aaral.  Tumulong siya kanyang mga magulang sa pagsasaka at nagtrabaho rin siya bilang miner. Nang malaman nito sa kanilang barangay na nagbibigay ng scholarship programs  ang Technical Education and Skills Development Authority (TESDA) sa mga out-of-school youth at indigenous peoples (IPs), agad siyang nagpatala, at  kumuha ng exam sa  Compostela Valley Scholarship Program (CVSP).  Aniya, kailangan niyang kumuha ng vocational course sa TESDA para makakuha ng maayos na trabaho.

Nag-enroll   siya sa  sa kursong 2-year ­Diploma in Welding Technology sa RTC-Korea Philippines Vocational Training Center sa Davao City at nagtapos noong 2017.  “Malaki  ang natulong nito sa akin, unang-una sa kaalaman ko, at nagkroon ako ng opportunity na makasali sa mga kompetisyon ng welding sa lokal at international.  Dahil din dito, naging proud ang pamilya ko sa akin.  Nakabili na ako ng motorsiklo at nabigyan ko na ng sariling negosyo ang aking pamilya.  Nabigyan din ako nang pagkakataon na  makapagtrabaho sa abroad,” ani Heinrich.

Ang una niyang naging trabaho pagka-graduate ay bilang welder-fabricator sa Davao Beta Spring.

Payo ni Heinrich sa mga kabataan na gustong sundan ang kanyang yapak, “mag-TESDA po tayo dahil malaki ang maitulong nito sa atin para ma-enhance natin ang ating skills at magkaroon ng magandang trabaho at opportunity sa buhay.  Mangarap lang tayo at magsikap hanggang magtagumpay.

“Malaki po ang pasasalamat ko dahil po sa TESDA nakarating ako sa kinaroroonan ko ngayon. At nagkaroon ako ng magandang pamumuhay at pag-asa sa buhay.   Sana’y marami pa pong matulongan kayo na katulad ko.”