LOTTO BUKAS NA ULIT; GOBYERNO NALUGI NG P250-M SA 4-DAY SHUTDOWN

IBINALIK na kahapon ang operasyon ng lotto matapos ang apat na araw na pagpapasara rito na nagdala ng pagka-lugi sa gobyerno ng umaabot sa P250 milyon.

Ipinaliwanag ni Presidential Spokesperson Salvador Panelo na matapos ang imbestigasyon ng Office of the President ay napag-alaman na walang korupsiyon na umiiral sa lotto.

Satisfied umano ang Pangulong Duterte sa operasyon ng lotto kaya agad ding binawi ang suspensiyon nito na nag-simula nitong Sabado.

Inamin ni  Panelo na noong una ay maraming natanggap na report na korupsiyon  ang Pangulo kaya ipinasara niya ang mga  lotto outlet upang hindi ito lumala.

Nang malaman sa imbestigasyon  na malinis ang lotto sa korupsiyon ay agad namang binawi ng Pangulo ang  suspensiyon dito.

Nilinaw nito na ang korupsiyon ay reklamo sa buong  gaming operations at nadamay na lamang ang lotto rito.

Sa kabilang dako, patuloy namang iniimbestigahan ng Palasyo   kung may nagaganap na  korupsiyon sa iba pang gaming operation ng PCSO  gaya ng Small-Town Lottery (STL), Keno at Peryahan ng Bayan (PNB).

Hinihinalang ang STL  ay ginagawang legal cover para sa jueteng.

Sa ulat ng  Commission on Audit kamakailan ay nakitaan ng  combined shortfall  o pagkalugi ng tinatayang  P14 bilyon mula sa  operasyon ng STL para sa 2017 at 2018.

Tiniyak ni PCSO General Manager Royina Garma  na magiging   “very, very, very strict” sila  kapag nagpatuloy na ang STL sa ilalim ng bagong  implementing rules.