HELPER, TRAINER NA!

DAHIL kulang ang kanyang pamasahe pabalik sa kanyang pinapasukang trabaho sa Cebu, naging blessing naman ito sa isang helper dahil nakapasok siya sa  isang scholarship program ng Technical Education and Skills Deve­lopment Authority (TESDA) at nagtapos ng kursong Automotive Servicing NC ll na nagpabago sa kanyang buhay.

Mula sa isang mahirap na magsasaka ang pamilya ni Celso O. Pobadora at kinagisnan nito ang  mga trabaho sa bukirin na hindi nila pag-aari.

Sa murang edad, tumutulong na si Celso sa kanyang mga magulang sa pagsasaka upang makatulong sa mga pangangailangan ng kanyang pamilya.

High school lamang ang kanyang tinapos sa pag-aaral dahil walang kakayahan ang kanyang mga magulang  upang  magpatuloy silang magkakapatid sa pag-aaral dahil sa kahirapan.

Namasukan ito bilang katulong sa isang rice mill sa kanilang lugar  na ang kanyang gawain ay pagbubuhat  at pagbibilad ng sako-sakong palay. Gayunpaman,  naaksidente siya nang makuryente at nasabugan ng electric transformer dahilan nang muntikan nitong ikasawi at pagputok ng kanyang tagiliran.

Halos isang taon din siyang naging baldado, na inalagaan ng kanyang ina, kaya lalo siyang nawalan nang pagkakataon na  maipagpatuloy pa ang kanyang pag-aaral.

Nang gumaling siya, naghanap uli ito ng trabaho.

Nakipagsapalaran sa iba’t ibang probinsiya, namasukan siya sa isang poultry farm bilang helper  hanggang makapasok siya bilang katulong sa isang motorcycle spare parts store sa Cebu.

Dito na nagsimula ang kanyang hilig sa pagkukumpuni ng  mga motorsiklo at makina at nagkaroon  siya ng ideya sa nasabing  uri ng industriya.

Nang magbakasyon si Celso sa kanyang pamilya  sa Sibugay, Cebu, hindi na siya nakabalik dahil kinapos  sa pamasahe.

Sa kabila nito, hindi naman  tumigil  sa pagdiskarte si  Celso  upang  kumita para sa kanyang pamilya  kung saan isa sa naging trabaho niya ay ang pangu­nguha ng tuba  at ibinebenta sa kanilang lugar.

Minsan, napadaan ito sa isang pagtitipon na inor­ganisa  ng Westmin Institute of Technology Inc., (WITI)  technical school na accredited ng TESDA sa Imelda, Zamboanga Zibugay na sakop ng Region 9 sa kanilang barangay  para sa paghahanap ng mga bagong scholar.

Dahil libre, napag-isipan ni Celso na mag-aplay bilang scholar sa ilalim ng Training for Work Scholarship Program (TWSP) ng TESDA.

Masuwerte siyang naka-enroll at naka-gradweyt sa kursong Automotive Servicing NC II at naging sertipikadong manggagawa.

Dahil sa kasipagan na kanyang ipinamalas, kinuha siya bilang mekaniko  ng Westmin Motorcycle and Auto Repair Shop.

Noong 2014,  siya ang itinanghal na Grand Winner for School Category at Best in Story Award sa  Tatak TESDA Video Making Contest kung saan itinampok ang kanyang buhay.

Sa kabila na malaki ang kanyang tiyansa na  makapagtrabaho sa abroad, mas pinili ni Celso  na manatili  sa bansa  dahil sa kanyang kagustuhan na makatulong sa mga kabataang katulad niyang hirap sa buhay na gustong  magkaroon ng kasanayan at makatapos ng pag-aaral.

Sa kasalukuyan, isa na siyang assistant trainer ng Automotive Servicing sa kanyang  paaralan  sa WITI.

“Sa TESDA, wala man kaming dato pero hayahay na gyud,” (Sa TESDA, wala man kaming pera/yaman pero hayahay ang buhay), pahayag ni Celso.