HIGIT 500K OFWs NAPAUWI DAHIL SA COVID-19

UMABOT na sa mahigit kalahating milyong overseas Filipino worker (OFW) na nawalan ng trabaho dahil sa pandemyang Covid-19 ang napauwi na ng pamahalaan.

Sa ulat kay Labor Secretary Silvestre Bello III, sinabi ni Overseas Workers Welfare Administration head Hans Leo Cac-dac na 502,581 OFWs ang ligtas na naiuwi sa kani-kanilang probinsiya matapos sumailalim sa Covid tests at quarantine protocols sa iba’t ibang hotel.

Binubuo ng 1,471 OFWs ang huling batch na nakauwi sa kani-kanilang tahanan nitong Sabado de Gloria.

Sa hiwalay na ulat ng DOLE-International Labor Affairs Bureau (ILAB), may 645,071 OFW ang naapektuhan ng pandemya at 627,576 sa mga ito ang nawalan ng trabaho. Ayon kay ILAB Director Alice Visperas, 49,698 na OFWs na nawalan ng trabaho ang humiling na makauwi ng bansa samantalang 75,297 ang piniling manatili sa kani-kanilang lugar.

Batay sa record ng ILAB, tumaas ang bilang ng mga  OFW na nahawahan ng sakit. Nitong Abril 4, nagtala  ng 17,495 kumpirmadong kaso ng Covid ng mga OFW batay sa ulat  ng 40 Philippine Overseas Labor Offices mula sa iba’t ibang bahagi ng mundo. Sa nasabing bilang, 10,155 ang gumaling, samantalang 938 naman ang nasawi.

Sinabi ni Bello na patuloy ang pamahalaan sa pagbibigay ng tulong sa mga nawalan at apektadong OFW.

“Hindi tatalikuran ng pamahalaan ang pangako nito na bibigyan ng kinakailangang tulong ang ating mga OFW. Patuloy natin silang tutulungan hangga’t kakailanganin nila,” wika ni Bello.

Sa ngayon, umabot na sa P5.043 bilyon ng DOLE-AKAP ang naipamahagi sa 497,122 OFWs.

Ang AKAP ay isang beses na tulong pinansiyal na $200 o P10,000 bawat  kwalipikadong apektado o nawalan ng trabahong OFW.

Maliban sa AKAP, nagbigay rin ng tulong-pinansiyal, pagkain at medikal ang DOLE sa mga OFW na nagkasakit ng COVID. Sa ngayon, umabot na sa kabuuang $1.93 milyon tulong-pinansiyal ang naibigay sa mga OFW na may COVID, at $2.6 milyon naman ang naipamahagi para sa pangangailangang medikal at pagkain ng 124,945 OFWs. LIZA SORIANO

Related posts:

3 OFWs NAKA-RECOVER SA COVID-19 60K OFWs NATURUKAN NA NG COVID VACCINE 348 OFWs NATULUNGANG MAKAUWI NG DOLE PANG-AABUSO SA OFWs PUWEDE NANG I-REPORT SA 24/7 HOTLINE DIPLOMATIC PROTOCOLS PARA SA OFWs 25% PAY HIKE SA OFWs SA HK 100 OFWs MULA UAE BALIK-BANSA POLISIYA SA DEPLOYMENT NG OFWs PALITAN