IP REBEL NAGING GOVERNMENT DEFENDER DAHIL SA TESDA

ANG libreng Carpentry Training na kanyang kinuha ang nagmulat sa kanya  upang higit niyang  maunawaan na ang gobyerno ay hindi lamang para sa iilan kundi para sa lahat.

Ito ang napagtanto ni Mar Trinidad, 25, taga-Alegria, Surigao del Norte, isang katutubong Mamanwa, da­ting  mi­yembro ng New People’s Army (NPA) at ngayo’y miyembro ng Citizen Armed Force Geographical Unit (CAFGU), matapos niyang sumailalim sa Carpentry and Masonry skills training ng Technical Education and Skills Development Authority (TESDA).

Taong  2016, 21-anyos noon  si Mar  nang mahikayat siyang sumanib sa NPA dahil ang kanilang lugar ay kabundukan, mahirap ang pamumuhay, at  malayo sa kabihasnan.  Madalas itong dinadalaw ng mga  opisyal at tauhan ng NPA upang manghikayat ng mga residente partikular ang mga kabataan para  sumanib sa kanilang kilusan.

Halos 2 taon  umano siyang nabulag sa ma­ling idolohiya  na ipinamulat sa kanila ng NPA, “na  ang pakikipaglaban sa gobyerno ang  ­tanging paraan upang malutas ang dinaranas nilang  kahirapan.”  Aminado si Mar, na mali siya sa pagsanib sa mga elemento na komukontra sa gob­yerno dahil “parang namumuhay kang walang mararating na tagumpay, at mamamatay  sa walang saysay na pakikipaglaban.” Taong 2017, nagdesisyon siyang kumalas sa grupo dahil sa nararanasang hirap sa kabundukan.

Nagkataon naman na  nagkaroon nang  intervention ang gob­yerno sa kanilang lugar sa pagtutulungan ng LGU ng Alegria at TESDA Surigao del Norte na nagsagawa ng Community Skills Training on Carpentry and Masonry.  Lumahok si  Mar  sa nasabing skills  training sa hangad nitong magkaroon ng hanapbuhay. Sa nasabing okasyon, inimbitahan siya na sumanib sa CAFGU at  2 taon na siyang naninilbihan sa gobyerno na dati nilang kalaban.

Malaki ang pasasalamat ni  Mar sa suporta ng gobyerno  sa pamamagitan ng ipinagkaloob na  free skills training sa Carpentry ng TESDA sa ilalim ng temang “TESDA Abot Lahat” para sa mga nagbabalik-loob na mga rebelde upang magkaroon sila ng hanapbuhay para masuportahan ang kanilang pamilya.

“Malaking tulong talaga sa akin, dagdag hanapbuhay at kita para sa akin at sa pamilya ko.  Magagamit ko sa paggawa ng sarili kong bahay at makatulong sa pamilya.”