CALOOCAN CITY– ISANG lalaki na hinihinalang sangkot sa ilegal na droga ang arestado nang mapansin na may sukbit na baril ng mga pulis na nagsasagawa ng surveillance operation sa lungsod na ito.
Kinilala ang naarestong suspek na si Saude Monti, 31, ng 3rd Floor, Bldg 11, MRH 4, Pabahay, Sta Rita Street, Brgy. 188, Tala.
Sa report ng District Special Operation Unit (DSOU) sa bagong upo na district director ng Northern Police District (NPD) na si P/Brig. Gen. Ronaldo Ylagan, alas-6:30 ng gabi nang maaresto ang suspek sa harap ng basketball court, MRH 4, Pabahay, Sta Rita, Brgy. 188, Tala.
Nagsasagawa ng surveillance operation ang mga tauhan ng DSOU sa nasabing lugar kontra sa No. 3 top most wanted person ng NPD nang maispatan nila ang suspek na may sukbit na baril habang nakatayo at nanonood ng basketball game.
Kinompronta ng mga pulis ang suspek at kinumpiska ang cal. 38 revolver nito na kargado ng dalawang bala at narekober din sa kanya ang dalawang malaking sealed transparent plastic na naglalaman ng hinihinalang shabu na tumitimbang sa 100.46 gramo at nasa P684,000 street value ang halaga at P1,500 cash. EVELYN GARCIA
Comments are closed.