LIBRENG TESDA SKILLS TRAINING SA JOURNALISTS, DEPENDENTS

MAAARI nang makakuha ng libreng skills training  mula sa Technical Education and Skills Development Authority (TESDA)  ang mga mamamaha­yag at kanilang dependents.

Ito ay makaraang lumagda ang TESDA at National Press Club (NPC) sa isang memorandum of agreement (MOA) na magbibigay ng training access sa mga journalist at sa kanilang pamilya.

Ang nasabing kasunduan ay nilagdaan nina TESDA Secretary Isidro Lapeña at NPC President Rolando Gonzalo, at sinaksihan  nina TESDA Deputy Director General Lina Sarmiento at NPC Vice President Paul Gutierrez.

Nakasaad sa kasunduan  na ang isang  mi­yembro ng NPC, kasama ang dalawang  miyembro ng pamilya nito ay maaaring makapag-avail ng  skills training, kabilang ang immediate family members ng mga biktima ng Maguinda­nao massacre.

Ayon kay Lepena, bahagi ng nasabing hakbang  ng TESDA na makatulong upang kahit papaano ay guminhawa ang pamumuhay ng  mga nabibilang sa marginalized sectors

“As long as they are qualified to be a TESDA scholar, we are ready to provide them the skills training they need to start something which may help them during this pandemic,” ani Lapena.

Ang mga kuwalipikadong benepisyaryo ay tatanggapin sa ilalim ng Training for Work Scholarship Program (TWSP) ng TESDA  na nakatuon sa Key Employment Generators (KEGs) sa mga lara­ngan ng agri-fishery, tourism, information technology, electronics, automotive, at iba pang priority manufacturing industries. LIZA SORIANO