MALABON CITY – Arestado ang isang 63-anyos na lola na hinihinalang tulak ng ilegal na droga sa ikinasang buy bust operation ng mga pulis sa Malabon City.
Kinilala ni Malabon Police Chief Col. Jessie Tamayao ang naarestong suspek na si Gloria Leabres, supervising administrative office (contract of service)-DILG at nakatira sa Kaunlaran Village, Brgy. 12, Caloocan city.
Sa kanyang report kay Northern Police District (NPD) Director PBGEN. Ronaldo Genaro Ylagan, sinabi ni Col. Tamayao na alas-12:45 ng tanghali ng isagawa ng mga operatiba ng Station Drug Enforcement Unit sa pangunguna ni PCPT Johnny Baltan, kasama ang PDEA CAMANAVA ang buy bust operation kontra sa suspek sa Pasco St. Brgy. Tonsuya, Malabon.
Kaagad sinunggaban ang suspek matapos bentahan ng isang plastic sachet ng shabu ang isang pulis na nagpanggap na buyer kapalit ng P500.
Ayon kay SDEU investigator PSSg. Ramos Timmago, nakumpiska lahat sa suspek ang nasa 1.38 gramo ng shabu na may street value na P9,384 ang halaga.
Kasong paglabag sa RA 9165 ang isinampa ng pulisya kontra sa suspek sa Malabon City Prosecutors Office. VICK TANES
Comments are closed.