NCAA: LADY RED SPIKERS BALIK SA PORMA

UMANGAT ang San Beda University sa solo fourth sa NCAA Season 95 women’s volleyball tournament makaraang magaan na dispatsahin ang Emilio Aguinaldo College (EAC) kahapon sa FilOil Flying V Centre sa San Juan.

Pinangunahan nina Cesca Racraquin at Nieza Viray ang 25-15, 25-16, 27-25 panalo ng Lady Red Spikers na pumutol sa kanilang  two-game slide at nagpanatili sa kanila sa kontensiyon para sa isang puwesto sa ‘Final 4’.

Tumapos si Racraquin na may 22 points sa 18 kills at 3 aces, bukod sa 7 receptions at 9 digs. Nag-ambag si Viray ng 13 points.

“I’m happy na na-break ‘yung slump and hopefully, tuloy-tuloy na,” ani Racraquin.

Kumana si Viray ng match-clinching kill na tumapos sa extended third frame, habang tumirada si Kim Manzano ng dalawang blocks upang tumapos na may 7 points para sa Lady Red Spikers.

Sa kanilang ika-4 na panalo sa anim na laro, ang San Beda ay kalahating laro ang angat sa walang larong Colegio de San Juan de Letran (3-2) sa karera para sa huling semifinals spot.

Ang Lady Red Spikers ay nakadikit din sa  University Perpetual Help at defending champion Arellano University na kapwa may 5-1 records sa ikalawang puwesto.

Sa iba pang laro ay nanatili ang Jose Rizal University (JRU) sa karera para sa isang Final 4 spot nang gapiin ang Mapua University.