OPAPP SA AFP: ISAULI ANG P192.5-M PAMANA FUND

HINIHILING  ni Presidential Peace Adviser Jesus Dureza sa pamunuan ng Armed Forces of the Philippines (AFP) na ibalik ang P192.5 milyon  na nailabas noong taong 2012 para sa mga road projects sa Maguinda­nao.

Ito ay programang pinaglaanan ng milyon milyong piso sa ilalim ng PAyapa at MAsaganang PamayaNAn (PAMANA) program subalit hindi naman naimplementa ng AFP.

Nakipag-ugnayan si Dureza sa mga opisyal ng AFP na pinamumunuan ni 52nd Engineering Brigade commander Brigadier General Dio­nisio Baudin Jr. Dito partikular na tinukoy ni Sec. Dureza ang naantalang implementasyon na P100-mil­yon para sa Lamud-Ganassi-Biarong road sa bayan ng South Upi at  P150 milyon  para sa Makir-Sibuto-Kinabaka road sa bayan ng Datu Odin Sinsuat.

Hindi naman umano pumalag ang AFP at agad na sumang-ayon ang kanilang mga kinatawan sa naging desisyon ni Sec. Dureza na ibalik sa kaban ng bayan ang hindi na­gamit na pondo at hihiling na lang ng bagong pondong angkop sa kasalukuyang costing kompara noong 2012.

Nabatid pa na bunsod ng matagal na pagkakabalam ng  implementas­yon ng proyekto, ang hindi nagamit na pera ay itinuturing na ng Commission on Audit (COA) bilang “unliquidated funds.”

Ayon pa sa kalihim, dapat na naimplementa na ang nasabing proyekto ng dating administras­yon  noon pang Hulyo 2012. “The funds had already been “downloaded” to the AFP,” ani Dureza.

“With funding from the Disbursement Acceleration Program (DAP), the previous OPAPP then released an initial amount of P192.5 million  for the implementation of the projects in South Upi and Datu Odin Sinsuat in Maguindanao. No full release of the original project amount was due to the subsequent Supreme Court ruling declaring the DAP funds illegal, “ ayon sa findings ng COA.   VERLIN RUIZ