PROGRAMA SA MALASAKIT CENTER PALALAWAGIN NI GO

NAIS  na palawakin ni  Special Assistant to the President (SAP) Christopher Lawrence ‘Bong’ Go ang Malasakit Center program upang  ito ay magamit ng maraming Filipino.

Ang Malasakit Center ay  ang one-stop shop program ni Pangulong Rodrigo Duterte na ang layunin ay pabilisin ang pag­hahatid ng  serbisyo medikal at  mabigyan  ng libreng gamot ang mga mahihirap na pasyente.

Sa kanyang State of the Nation Address nitong Hulyo, sinabi ng Pangulo na si Go ang instrumento sa pagpapatupad  ng Malasakit Centers.

Sa ilalim ng programa,  aasistehan ang mga pasyente upang makakuha ng serbisyo at tulong pinansiyal  na kaloob ng Philippine Charity Sweepstakes Office (PCSO),  Philippine Amusement and Games Corporation (PAGCOR), at Department of Social Welfare and Development (DSWD).

Kapag pinagsama-sama, ang mga ayudang ito ay makababawas sa medical bill ng pasyente, kasama na ang mga gamot, sa mas mababang halaga o minsan ay zero na o wala nang halos babayaran sa ospital.

Sa kasalukuyan ay mayroong limang Malasakit Centers sa bansa, tatlo sa Visayas: ang Vicente Sotto Memorial Center sa Cebu City, Western Visayas Medical Center  sa Iloilo City, at ang Eastern Visayas Regional Medical Center sa Tacloban City,  isa sa  Davao City at isa pa sa Philippine General Hospital sa Manila.

Sa isang panayam kay Go sa pagbisita nito sa mga nasunugan sa Mandaluyong City noong hatinggabi ng Agos­to 30, sinabi ni Go ang plano ng gob­yerno na magpatayo ng dagdag na Centers upang mapakinaba­ngan ng maraming mamamayan.

“May programa iyong gobyerno. Ito po ‘yung gusto ko palawakin o palakasin ‘yung Malasakit Center, kasi alam ko napakaraming nangangailangan ng medisina at saka libreng gamot,” dagdag ni Go.

“Let’s say PCSO may limit ‘yung (subsidy), hanggang dulo, ‘yun na iyong Malasakit doon na kami talagang tutulong hanggang sa kaya, kung kayang ma­ging zero bill. After PhilHealth, after DSWD, after PCSO, then sa dulo kung magkano iyong maiwan na bill iyon ang sasagutin,” dagdag pa ni Go.