REPORMA SA POC

MARAMI ang nabig­la at nanghinayang sa pagbibitiw kamakailan ni Ricky  Vargas bilang presidente ng Philippine Olympic Committee (POC). “Irrevocable”  ang resignation na isinumite ni Vargas sa executive board ng POC kaya wala nang pag-asang makumbinse siyang bumalik sa puwesto at ipagpatuloy ang pagsusulong ng mga repormang pinaplano ni­ya para sa organisasyon.

Noon pa mang Abril ay may senyales nang hindi komportable si Vargas sa kanyang puwesto sa POC.  Nasabi nyang hindi  raw siya sanay sa kultura ng maruming politika sa organisasyon at ito sana ang gusto niyang baguhin. Ang plano ni Vargas ay gawing “honest” at “less political” ang POC para makatuon sa mga  prayoridad na dapat na isinasagawa nito sa halip na maubos ang oras sa mga away-away at politika.

Hindi diniretso  ni Vargas sa kanyang resignation letter kung bakit ba siya nagbitiw. Ang sabi lang niya ay napagtanto niyang may mga iba pang ‘sports leaders’ na mas maibibigay  ang kanilang panahon at interes para maisagawa nang mas epektibo ang mga programa ng POC.

Pero may bulung-bulungan na ang totoong dahilan ay hindi na masikmura ni Vargas ang intriga, politika at korupsiyon sa POC.

Ngayong wala na si Vargas, sino pa ang mga natitirang tapat, may integridad at prinsipyo sa POC para repormahin ang organisasyon?

Si Congressman Bambol Tolentino, ang POC chairman, ang maaaring magpatuloy sa mga repormang nais ipatupad ni Vargas sa POC. Tulad ni Vargas, ang hangad ni Tolentino ay magkaroon ng pagbabago sa POC para ito ay maging isang tunay at epektibong instrumento sa pagpapaunlad ng estado ng sports sa Filipinas.

Hindi nag-aksaya ng panahon si Tolentino at agad na kumilos para maisulong ang sa palagay niya ay tama at nararapat.

Inanunsiyo niya ang kanyang planong magpatawag ng special election para sa bagong presidente ng POC. Aniya, ihahayag niya ang kanyang balak sa General Assembly ng POC sa Martes, June 25.

May kapangyarihan si Tolentino na gawin ito dahil sa ilalim ng Article 7, Section 6 ng POC Bylaws, maaaring magpatawag ng eleksiyon ang chairman sa loob ng 30 araw simula nang mabakante ang posisyon ng presidente kung ang dalawang vice presidents ng POC ay hindi kuwalipikado  na umupong  presidente  ng organisasyon.

Ayon sa POC Bylaws, ang presidente ng POC ay dapat na kasalukuyang presidente rin ng isang Olympic Sport-National Sports Association (NSA).

Nakasaad din sa Article 7 Section 11 na ang presidente ay dapat na may hindi bababa sa  apat na taong experience bilang NSA president ng isang Olympic sport sa panahon na siya ay mahalal na presidente ng POC. Dapat din siyang aktibong miyembro ng POC General Assembly sa dalawang magkasunod na taon at dapat na nahalal mula sa kasalukuyang hanay ng mga  presidente ng NSA-Olympic sport.

Si 1st vice president Jose Romasanta ay vice president lamang ng NSA-volleyball, samantalang si 2nd VP Antonio Tamayo ay presidente ng NSA-soft tennis, na hindi Olympic sport. Kaya malinaw na hindi kuwalipikado ang dalawang ito na maupo bilang presidente ng POC.

Gagawin lamang ni Tolentino ang kanyang katungkulan bilang chairman sa pagpapatawag ng eleksiyon para sa bagong presidente ng POC.

Kailangang magtagumpay  si Tolentino sa nararapat niyang gawin at maitawid ito mula  sa mga intriga, fake news at maruming pamumulitika ng ilang opisyal ng POC na puro pansariling kapakanan lang ang iniisip.

Wala na nga yatang pakialam ang ilang opisyal na ito kung magtagumpay ba o hindi ang Filipinas  sa pagho-host ng Southeast Asian Games ngayong Nobyembre. Basta ang pinangangalagaan lang nila ay ang kanilang sari­ling interes.

Dapat ay maka­paghalal ng isang matino, at marahil, kasing tapang ng Pangulong Digong para maituwid ang mga mali sa POC. Kailangan ni Tolentino ng isang matatag na kakampi sa loob ng organisasyon para matupad ang layunin ni  Taguig Congressman-elect Alan Peter Cayetano, ang chairman ng  Philippine Southeast Asian Games Organizing Committee, na gawing “best hosted and most viewed” ang SEA Games ngayong taon sa Filipinas.